ڈیلس ۔ آئی سی سی ٹی ٹوئنٹی ورلڈکپ کے افتتاحی میچ میں امریکہ نے کینیڈا کو7 وکٹ سے شکست دے دی۔ ڈیلس میں کھیلے گئے گروپ اے کے میچ میں امریکی ٹیم نے 195 رنزکا ہدف 3 وکٹوں کے نقصان پر 17.4 اوورز میں حاصل کیا۔ امریکہ نے ٹاس جیت کر کینیڈا کو پہلے بیٹنگ کی دعوت دی ، کینیڈا نے عمدہ کارکردگی کا مظاہرہ کرتے ہوئے 5 وکٹوں کے نقصان پر 194 رنز بنائے ۔کینیڈا کے بیٹر نوَنیت دھالیوال نے61 رنز، نکولس کرٹن 51 رنز، آرون جانسن 23 رنز بناکر آوٹ ہوئے جبکہ شریاس مووا نے 16 گیندوں پر 32 رنز بناکر اسکور آگے بڑھانے میں اہم کردار اداکیا۔ ہدف کا تعاقب کرتے ہوئے امریکی ٹیم کا آغاز اچھا نہ تھا، اس کی پہلی وکٹ صفر پرگری تاہم اس کے بعد امریکی ٹیم نے میچ میں اپنی گرفت مضبوط رکھی اور اسے آخر تک قائم رکھا۔ امریکی ٹیم کے اینڈریزگوس نے 65 رنزکی شاندار اننگز کھیلی جبکہ ایرن جونز 94 رنز بنا کر ناٹ آؤٹ رہے۔ اس سے قبل ٹاس کے موقع پر امریکہ کے کپتان مونانک پٹیل نے کہا کہ پہلے فیلڈنگ کا فیصلہ وکٹ دیکھ کرکیا۔ انہوں نے مزید کہا کہ ہدف حاصل کریں گے، پہلی اننگز میں وکٹ بولرزکو مدد فراہم کرے گی۔ کینیڈین کپتان سعد ظفر نے کہا کہ وکٹ اچھی ہے، پہلے بیٹنگ کرنے میں کوئی مسئلہ نہیں اور اس کے بعد ان کی ٹیم نے ایک عمدہ اسکور بھی کیا۔ انہوں نے کہا کہ یہ ورلڈ کپ ہے، دو طرفہ سیریز نہیں، اس لیے دباو رہے گا، پْراعتماد ہیں، اچھی کارکردگی کا مظاہرہ کریں گے۔ ٹاس کے بعد آئی سی سی ٹی ٹوئنٹی ورلڈ کپ کی مختصر سی افتتاحی تقریب بھی ہوئی تھی، جس میں گراؤنڈ میں کینیڈا اور امریکہ کے پرچم کے ساتھ قومی ترانے بجائے گئے اور آتش بازی کا مظاہرہ بھی کیا گیا۔ دونوں ممالک کی ٹیموں نے پہلی مرتبہ ٹی ٹوئنٹی ورلڈ کپ میں حصہ لیا۔ قدیم ترین حریف ٹیمیں 180 سال بعد ٹی ٹوئنٹی ورلڈ کپ کے افتتاحی میچ میں آمنے سامنے ہوئیں۔ امریکا اورکینیڈا کے درمیان آخری 3 روزہ میچ 1844ء میں ہوا تھا، نیویارک میں کھیلا گیا میچ کینیڈا نے 23 رنز سے جیتا تھا۔ علاوہ ازیں ٹی ٹوئنٹی ورلڈ کپ میں 6 جون کو امریکہ اب پاکستان کے خلاف کھیلے گا۔
