ممبئی، 19 جولائی (ایجنسیز) لجنڈری اداکار امیتابھ بچن کے رئیلٹی شو ’کون بنے گا کروڑ پتی‘ کو 25 برس مکمل ہوگئے۔ بالی ووڈ کے سوپر اسٹار امیتابھ بچن کو جہاں ان کی اداکاری کیلئے دنیا بھر میں شہرت حاصل ہے، وہیں ان کے رئیلٹی شو ’کے بی سی‘ کے بھی ہندوستان سمیت کئی ممالک میں چرچے ہیں اور مداح انہیں اس پروگرام کے میزبان کے طور پر بھی بہت پسند کرتے ہیں۔ امیتابھ بچن اس شو میں لوگوں کو سوالات کے جوابات دینے پر کروڑوں روپئے انعام میں دیتے ہیں مگر کیا آپ جانتے ہیں وہ خود اس شو کو کرنے کیلئے کتنا معاوضہ وصول کرتے ہیں؟ پرائیویٹ ٹی وی چیانل کی جانب سے اس مشہور شو کے 17ویں ایڈیشن کا اعلان بھی کردیا گیا ہے جو کہ 11 اگست سے ٹیلی کاسٹ ہوگا۔ خبریں ہیں کہ امیتابھ بچن اس ایڈیشن کے ایک ایپیسوڈ کیلئے 5 کروڑ روپئے معاوضہ وصول کریں گے۔ تاہم اس کی کوئی تصدیق نہیں کی گئی۔ شائقین گیم شو کے پریمیئر کا پرجوش انداز میں انتظار کر رہے ہیں۔