حیدرآباد۔/6اکٹوبر، ( سیاست نیوز) وزیر بلدی نظم و نسق کے ٹی راما راؤ نے ایم بی بی ایس کے ایک طالبہ کی مدد کی ہے جو اپنی ٹیوشن فیس کی ادائیگی کے بارے میں فکر مند تھیں ۔ بتایا جاتا ہے کہ حیدرآباد کے بورا بنڈہ علاقہ سے تعلق رکھنے والی تروپتی انوشا کرغستان ہیلت یونیورسٹی میں ایم بی بی ایس کی تعلیم حاصل کررہے ہیں۔ انوشا جو میرٹ اسٹوڈنٹ ہے انہوں نے اپنے تین سالہ ایم بی بی ایس کورس میں 95 فیصد نشانات حاصل کئے۔ انوشا کو کورونا وباء کے پیش نظر وطن واپس ہونا پڑا۔ معاشی حالات خراب ہونے پر انوشا نے اپنی ماں کے ساتھ ترکاری فروخت کرنا شروع کردیا جبکہ ان کے والد واچ مین کے طور پر ڈیوٹی انجام دے رہے ہیں۔ انوشا کرغستان واپسی اور اپنی تعلیم جاری رکھنے کے بارے میں مایوس ہوچکی تھیں۔ انوشا کی صورتحال کے بارے میں جب وزیر انفارمیشن ٹکنالوجی کے ٹی راما راؤ کو اطلاع ملی تو انہوں نے مدد کیلئے دست تعاون دراز کیا۔ انوشا نے آج کے ٹی آر سے ملاقات کی اور کے ٹی آر نے انہیں بیرون ملک تعلیم جاری رکھنے کیلئے درکار رقم کا چیک حوالے کیا۔ کے ٹی آر نے مستقبل میں تعلیم کیلئے نیک تمناؤں کا اظہار کرتے ہوئے کہا کہ انوشا ایک ڈاکٹر کی حیثیت سے اپنے وطن واپس ہوں گی اور ضرورت مند افراد کی خدمت کریں گی۔ انوشا اور ان کے افراد خاندان نے فیس اور دیگر ضروریات کے انتظام پر کے ٹی آر سے اظہار تشکرکیا۔ر
