حیدرآباد کی برانڈ امیج کو عالمی سطح تک پہونچانے والے قائد کے خلاف غیر جمہورتی اقدامات
حیدرآباد 20 نومبر : ( سیاست نیوز) : بی آر ایس قائد و رکن اسمبلی ٹی ہریش راؤ نے حیدرآباد کی برانڈ امیج کو عالمی سطح تک پہونچانے والے کے ٹی آر کے خلاف غیر قانونی مقدمات درج کرنے کی مذمت کی اور اس کو سیاسی انتقام قرار دیا ۔ سوشیل میڈیا پلیٹ فارم ایکس پر ہریش راؤ نے کہا کہ حکومت کی ناکامیوں کو بے نقاب کرنے والے قائدین کی آواز کو دبانے کی کوشش غیر جمہوری طرز حکمرانی کی علامت ہے ۔ انہوں نے چیف منسٹر ریونت ریڈی کو تنقید کا نشانہ بنایا اور کہا کہ ریاست میں مقامی اداروں کے انتخابات سے قبل سرکاری اختیارات کا غلط استعمال کرکے سیاسی فائدہ اٹھانے کی کوشش کی جارہی ہے جس کی بی آر ایس مذمت کرتی ہے ۔ حکومت بی آر ایس ورکنگ صدر کے ٹی آر کے خلاف سیاسی انتقام پر اتر آئی ہے ۔ ایک جمہوری عہدے پر فائز چیف منسٹر کو غیر جمہوری اقدامات کرنا زیب نہیں دیتا ۔ حکومت کی ناکامی اور عوامی مسائل کے خلاف جدوجہد کرنے والے کے ٹی آر کی آواز کو دبانے کی کوشش کی جارہی ہے ۔ جھوٹے مقدمات درج کرکے سیاسی ڈرامہ بازی کی جارہی ہے ۔ عوام سب دیکھ رہے ہیں ۔ ان مقدمات سے کے ٹی آر اور دوسرے قائدین کے حوصلے پست نہیں ہوں گے بلکہ بی آر ایس اپوزیشن کا تعمیری رول ادا کرکے حکومت کی ناکامیوں کا پردہ فاش کرے گی ۔ ہریش راؤ نے کہا کہ کانگریس حکومت کی دو سالہ کارکردگی مایوس کن ہیں وعدوں پر عمل نہ ہونے کی وجہ سے عوام میں حکومت کے خلاف ناراضگی پائی جاتی ہے ۔ کانگریس حکومت صرف شفافیت کا دکھاوا کررہی ہے ۔ اصل میں عوامی مسائل پر کوئی سنجیدہ کام نہیں کیا جارہا ہے ۔ انہوں نے کہا کہ بی آر ایس پوری مضبوطی سے کے ٹی آر کے ساتھ کھڑی ہے ۔ حکومت کے غلط اقدامات کا قانونی محاذ پر بھرپور مقابلہ کیا جائے گا ۔۔ 2
