میدک میں ضلع کلکٹر ایس ہریش کا عہدیداران کے اجلاس سے خطاب
میدک۔ ضلع کلکٹر میدک مسٹر ایس ہریش نے کسانوں کو انتباہ دیتے ہوئے کہا کہ کسان اگر کھیتوں میں اپنی فصلوں کے ساتھ کہیں گانجہ کی کاشت کرتے ہیں تو ان کے خلاف فوجداری مقدمات کا اندراج ہوگا۔ سرکاری فوائد سے بھی محروم کردیا جائے گا۔ ضلع کلکٹر میدک اپنے چیمبر میں دیگر عہدیداروں کے ساتھ منعقدہ ایک میٹنگ میں یہ بات کہی۔ انہوں نے بتایا کہ صلع میں اب تک گانجہ کاشت کرنے والے تین کسانوں کے خلاف مقدمات درج کرلئے گئے ہیں اور منڈل ریگوڈ اور الدوگ کے سیوار میں 1283 پودے گانجہ تلف کئے گئے ہیں۔ ضلع کلکٹر نے کہا کہ منڈل اگریکلچرل آفیسرس اور پنچایت سکریٹریز کو چاہئے کہ اپنے علاقوں کے کھیتوں کا معائنہ کرتے رہیں اور فوری طور پر پولیس میں شکایت کردیں۔ انہوں نے کہا کہ گانجہ کی کاشت کے کیسوں کی روک تھام کے لئے محکمے نشہ بندی اور محکمہ پولیس میں شراکت چاہئے اور اگر ضرورت پڑنے پر ٖی ڈی ایکٹ کے تحت بھی خدمات درج کئے جاسکتے ہیں۔ ضلع کلکٹر نے عوام سے کہا کہ اگر کسی دیہات کے سیوار میں فصلوں کے ساتھ گانجہ اگایا جارہا ہو کسی کو اس سے متعلق علم ہوتو مقامی پولیس کو مطلع کریں ان کے نام مخفی رکھے جائیں گے۔ اس دوران ضلع کلکٹر نے کووڈ ویکسین کا جائزہ لیتے ہوئے بتایا کہ ضلع بھر میں اب تک 15 لاکھ 48 ہزار کو ویکسین دینے کا نشانہ مقرر کیا گیا تھا جس کے منجملہ 14 لاکھ 25 ہزار کو ویکسین دیا گیا ہے۔ جاریہ ماہ کے اختتام تک باقی افراد کو ویکسین دے کر مقررہ نشانے کو پورا کرلیں۔ انہوں نے عوام سے اپیل کی کہ ویکسین کے بارے میں غلط فہمیوں کو دور کریں۔ اس طرح ضلع کلکٹر نے پنچایت راج انجینئرس کو ہدایت دیتے ہوئے کہا کہ میدک اندرا گاندھی اسپورٹس اسٹیڈیم میں جاری ترقیاتی کاموں کو جنگی خطوط پر مکمل کرلیں۔ اس میٹنگ میں ایڈیشنل کلکٹرس پرینتا سنگھ، جی رمیش ایڈیشنل ایس پی مسٹر کرشنا مورتی، ضلع پریشد چیف ایگزیکٹیو آفسر مسٹر ایم وی سیلیش، ڈپٹی سی ای او سبھاشنی، ضلع آبکاری آفیسر عبدالرزاق، ڈسٹرکٹ پنچایت آفیسر مسٹر ترون، ڈسٹرکٹ میڈیکل آفیسر وینکٹیشور راؤ، ڈی ایس او مسٹر سرینواس، ڈسٹرکٹ اگریکلچرل آفیسر پرشورام نائک، ڈی ای او مسٹر رمیش کمار، ڈسٹرکٹ یوتھ آفیسر مسٹر ناگراج اور پنچایت راج کے ایگزیکٹیو انجینئر بھی موجود تھے۔