حیدرآباد، 18/ اگست (یواین آئی) شہر حیدرآباد کے مشہور گاندھی اسپتال جہاں ایک مریض کی رشتہ دارنے اس کی اور اس کی بہن کی لیب ٹکنیشین کی جانب سے عصمت دری کی شکایت کی ہے ، کے معاملہ کا قومی ایس سی کمیشن نے سخت نوٹ لیا ہے ۔کمیشن نے متاثرہ خاتون کی شکایت کے باوجود ایف آئی آردرج کرنے میں ناکامی پر برہمی کا اظہار کیا۔کمیشن نے اس خصوص میں تلنگانہ کے چیف سکریٹری،ڈی جی پی، محکمہ داخلہ کے سکریٹری، محکمہ صحت کے سکریٹری کو نوٹس جاری کی ہے ۔ایس سی کمیشن کے نائب صدرنشین ارون ہلدال نے یہ نوٹس جاری کی ہے ۔اسی دوران اس سنسنی خیز معاملہ کے منظرعام پر آنے کے بعد اسپتال کے قریب پولیس کا بھاری بندوبست دیکھاگیاہے ۔مختلف خواتین تنظیموں اور سیاسی جماعتوں کی جانب سے اس واقعہ کے خلاف احتجاج کیاجارہا ہے ۔اسی کے پیش نظر پولیس کی جانب سے بھاری بندوبست کیاگیا ہے اورصرف اسپتال کے ملازمین،مریضوں اور ایمبولنس گاڑیوں کو ہی اسپتال میں اندرجانے کی اجازت دی جارہی ہے ۔آج وائی ایس آرتلنگانہ کی خاتون کارکنوں نے اسپتال کے محاصرہ کی کوشش کی اور مطالبہ کیاکہ متاثرہ خاتون سے ریاستی حکومت انصاف کرے ۔