نئی دہلی۔ 4مارچ (سیاست ڈاٹ کام)کانگریس نے الزام لگایا ہے کہ گجرات میں بھارتیہ جنتا پارٹی حکومت کی لاپرواہی سے پیڈیا ٹرک کیئر سینٹر وں پر دو سال میں 15 ہزار سے زیادہ بچوں نے دم توڑا ہے اور اس ناکامی کو دیکھتے ہوئے وزیر اعلی وجے روپانی کو فوری طور استعفی دینا چاہئے ۔ گجرات کانگریس کے سینئر لیڈر اور کانگریس کے بہار کے انچارج شکتی سنگھ گوہل نے چہارشنبہ کو پارلیمنٹ ہاؤس کے احاطے میں صحافیوں سے کہا کہ ریاستی حکومت کی بے حسی کی وجہ سے ان سینٹروں پر ہر روز 20 سے زیادہ بچے دم توڑ رہے ہیں اور دو سال میں 15 ہزار سے زیادہ بچے ریاستی حکومت کی لاپرواہی کی بھینٹ چڑھ چکے ہیں ۔ انہوں نے کہا کہ حیرت کی بات یہ ہے کہ جو احمد آباد پارلیمانی حلقہ وزیر اعظم نریندر مودی کا حلقہ رہا ہے اور اب وزیر داخلہ امت شاہ کا حلقہ ہیں، وہاں کے سینٹروں پر سب سے زیادہ 4322 بچوں کی موت ہوئی ہے ۔ اس پارلیمانی حلقہ میں ان سنٹروں میں دخل ہونے والے 50 فیصد بچوں نے دم توڑا ہے ۔ اس کے بعد سے سب سے زیادہ بچے وزیر اعلی کے حلقہ راجکوٹ میں مرے ہیں ۔