احمد آباد: گجرات کے ڈانگ ضلع میں اتوار کو ایک خوفناک سڑک حادثہ پیش آیا جس میں 7 افراد ہلاک اور دیگر متعدد زخمی ہوگئے۔ یہ افسوسناک واقعہ صبح تقریباً 4 بجے ساپوترا گھاٹ روڈ پر پیش آیا جب ایک پرائیویٹ بس 200 فٹ گہری کھائی میں گرگئی۔ کھائی میں گرنے سے بس دو ٹکڑے ہوگئی۔ حادثہ کا شکار ہونے والی بس مدھیہ پردیش کے گنا سے ترمبکیشور کا دورہ کرنے کے بعد واپس آرہی تھی جس میں 48 افراد سوار تھے۔ پولیس کے مطابق بس بے قابو ہوکر کھائی میں جا گری جس کے باعث 7 مسافر موقع پر ہی ہلاک ہوگئے۔ حادثہ کی اطلاع ملتے ہی مقامی پولیس اور ریسکیو ٹیم فوری طور پر موقع پر پہنچ گئی اور زخمیوں کو نکال کر ہاسپٹل پہنچایا۔ ڈانگ ڈسٹرکٹ سپرنٹنڈنٹ آف پولیس ایس کے سنگھ نے بتایا کہ یہ حادثہ ساپوترا ہل اسٹیشن کے قریب پیش آیا۔ انہوں نے کہا کہ ابتدائی تحقیقات کے مطابق بس ڈرائیور بس پر سے کنٹرول کھو بیٹھا، جس کی وجہ سے بس حفاظتی رکاوٹ کو توڑ کر وادی میں گر گئی۔
زخمی عقیدتمندوں کو گجرات کے آہوا کے سول اسپتال میں داخل کرایا گیا ہے۔ عہدیداروں نے یہ بھی بتایا کہ یہ عقیدت مند 48 یاتریوں کو مہاراشٹر کے ترمبکیشور سے گجرات کے دوارکا لے جارہے تھے۔ مرنے والوں اور زخمیوں میں مدھیہ پردیش کے گنا، شیو پوری اور اشوک نگر اضلاع کے لوگ شامل ہیں۔
