اب یہ نہیں چلے گا‘ آر جے ڈی قائدتیجسوی یادو کی این ڈی اے پر تنقید
پٹنہ ۔2؍ نومبر ( ایجنسیز )بہار اسمبلی انتخابات کی تشہیر کے دوران راشٹریہ جنتا دل (آر جے ڈی) کے رہنما اور مہاگٹھ بندھن کے وزیراعلیٰ کے امیدوار تیجسوی یادو نے اتوار کو مکامہ میں ایک عظیم الشان انتخابی ریالی سے خطاب کیا۔ اس موقع پر انہوں نے اعلان کیا کہ ان کی لڑائی غریبی، بے روزگاری، مہنگائی، بدعنوانی، پلاین (نقل مکانی) اور مجرموں کے خلاف ہے۔ انہوں نے مکامہ کی عوام سے آر جے ڈی امیدوار کے حق میں ووٹ دینے کی اپیل کی۔تیجسوی یادو نے کہا کہ مکامہ میں جمع عوام کا جوش اور جذبہ اس بات کا ثبوت ہے کہ اب بہار میں تبدیلی طے ہے۔ انہوں نے کہاکہ این ڈی اے کو 20 برس ملے مگر وہ بہار کی تقدیر نہیں بدل سکے جو وہ 20 برس میں نہ کر سکے ہم 20 مہینے میں کر دکھائیں گے۔آر جے ڈی رہنما نے اپنی سابقہ حکومت کی کارکردگی کا ذکر کرتے ہوئے کہا کہ ہم نے 17 مہینے میں پانچ لاکھ نوکریاں دیں۔ وزیراعلیٰ نتیش کمار پوچھتے تھے کہ پیسہ کہاں سے آئے گا، نوکریاں کہاں سے دوں گا؟ ہم نے کر کے دکھایا۔ میری عمر کم ہو سکتی ہے مگر میری زبان پکی ہے۔ انہوں نے عوام سے اپیل کی کہ انہیں صرف 20 مہینے کا موقع دیا جائے تاکہ بہار کو ترقی کی راہ پر گامزن کیا جا سکے۔تیجسوی یادو نے کہا کہ ان کی حکومت میں ہر گھر کو روزگار ملے گا، تعلیم کا معیار بلند ہوگا اور کسانوں کی آمدنی دوگنی کی جائے گی۔ انہوں نے کہا کہ وہ بہار کو ایسی ریاست بنانا چاہتے ہیں جہاں کسی کو باہر روزگار کی تلاش میں نہ جانا پڑے۔مرکزی وزیر داخلہ امیت شاہ پر حملہ کرتے ہوئے تیجسوی نے کہاکہ میں ڈرا ہوا نہیں ہوں۔ میں بہاری ہوں اور ’ایک بہاری سب پر بھاری‘ ہے۔ میں لالو پرساد یادو کا بیٹا ہوں، مودی اور شاہ سے ڈرنے والا نہیں۔ انہوں نے جوش بھرے انداز میں کہاکہ طوفان سے لڑنے کا مزہ ہی کچھ اور ہے، ہم پیچھے ہٹنے والے نہیں۔ 14 نومبر کو نتیجے آئیں گے اور 18 نومبر کو ہم حلف لیں گے۔