حیدرآباد 18 اگست (سیاست نیوز) تلنگانہ میں تلگو دیشم نے بس یاترا کا اعلان کیا ہے تاکہ پارٹی کو مستحکم کیا جاسکے۔ صدر تلنگانہ تلگو دیشم کاسانی گیانیشور کے مطابق گریٹر حیدرآباد میں بس یاترا کا اہتمام کیا جارہا ہے جس میں پارٹی صدر این چندرا بابو نائیڈو شرکت کرینگے۔ انہوں نے کہا کہ بس یاترا کے روٹ میاپ کو قطعیت دی گئی ہے۔ جوبلی ہلز ، پدما گڑی سے یاترا کا آغاز ہوگا ۔ تاریخ کے تعین کا اختیار چندرا بابو نائیڈو کو دیا گیا ہے۔ توقع ہے کہ اندرون دو یوم یاترا کی تاریخ کا اعلان کیا جائیگا ۔ گیانیشور نے کہا کہ حیدرآباد کی ترقی میں چندرا بابو نائیڈو کا اہم رول ہے۔ گریٹر حیدرآباد کے اسمبلی حلقہ جات میں تلگو دیشم کو عوامی تائید حاصل ہے ۔
