وزیر کے ٹی آر یوسف گوڑہ میں اسکیم کا افتتاح کریں گے
حیدرآباد :۔ ریاستی وزیر بلدی نظم و نسق کے ٹی آر جی ایچ ایم سی کے حدود میں 20 ہزار لیٹر پانی مفت تقسیم کرنے کی اسکیم کا 11 جنوری کو یوسف گوڑہ سے آغاز کریں گے ۔ حیدرآباد میٹرو واٹر ورکس کی جانب سے اس کے لیے تیاریوں میں تیزی پیدا کردی ہے ۔ چیف منسٹر کے سی آر نے جی ایچ ایم سی کے انتخابات سے قبل گریٹر حیدرآباد کے عوام کو 20 ہزار لیٹر مفت پانی سربراہ کرنے کا اعلان کیا تھا اور اس کو جی ایچ ایم سی کے انتخابی منشور میں شامل کیا تھا ۔ دو ہفتہ قبل واٹر ورکس کے عہدیداروں کا اجلاس طلب کرتے ہوئے اس اسکیم پر عمل آوری کا کے ٹی آر نے جائزہ لیا تھا اور اسکیم پر عمل آوری کے لیے منصوبہ تیار کرنے کی عہدیداروں کو ہدایت دی تھی ۔ اس اسکیم پر عمل آوری کے لیے حکومت نے پہلے ہی رہنمایانہ خطوط جاری کئے ہیں ۔ ابھی تک آبرسانی کا بل ادا کرنے والے گریٹر حیدرآباد کے عوام کو اسکیم پر عمل آوری کے آغاز سے راحت حاصل ہوگی ۔۔
