تکنیکی خرابی کے باوجود ہمارے مشن میں تاخیر نہیں ہوگی ، تنظیم کا موقف
غزہ، 30 ستمبر (یو این آئی) غزہ کے مظلوموں کی مدد کے لئے جانے والے غیرملکی امدادی قافلے گلوبل صمود فلوٹیلا نے 4 روز میں غزہ پہنچنے کا اعلان کردیا۔ غیر ملکی ذرائع ابلاغ کے مطابق گلوبل صمود فلوٹیلا کی تنظیم کا کہنا ہے کہ تکنیکی خرابی کے باوجود ہمارے مشن میں بڑی تاخیر نہیں ہوگی۔ غیرملکی خبر ایجنسی کے مطابق تنظیم کا کہنا ہے کہ 47 جہازغزہ کی طرف رواں دواں ہیں، قافلے کا مقصد اسرائیلی محاصرے کو توڑ کر غزہ کو انسانی امداد پہنچانا ہے ۔ دوسری جانب اپوزیشن سے تعلق رکھنے والے امریکی سینیٹرز نے امریکی صدر ڈونالڈ ٹرمپ کی انتطامیہ سے گلوبل صمود فلوٹیلا کو تحفظ دینے کیلیے اقدامات کرنے کا مطالبہ کردیا۔ قطری نشریاتی ادارے الجزیرہ کی رپورٹ کے مطابق اپوزیشن جماعت ڈیموکریٹک پارٹی سے تعلق رکھنے والے چار سینیٹرز نے وزیر خارجہ مارکو روبیو کو خط لکھا۔ سینیٹرز نے مارکو روبیو سے مطالبہ کیا کہ وہ گلوبل صمود فلوٹیلا پر سوار افراد کی حفاظت کو یقینی بنائیں اور اسرائیلی وزیر اعظم نیتن یاہو کی حکومت پُرامن قافلے کے خلاف کسی بھی قسم کی طاقت کے استعمال سے گریز کرے ۔ انہوں نے مشترکہ خط میں لکھا کہ گلوبل صمود فلوٹیلا اس وقت بحیرہ روم میں سفر کر رہا ہے جس کا مقصد غزہ کیلیے ضروری انسانی امداد پہنچانا ہے لیکن اطلاعات ہیں کہ اسے ڈرونز حملوں اور دیگر دشمنی آمیز کارروائیوں کا سامنا کرنا پڑا ہے ۔ اسرائیل نے گلوبل صمود فلوٹیلا کو روکنے کیلیے اسپیشل بحری کمانڈوز کو ٹاسک دے دیا ان کا کہنا تھا کہ بین الاقوامی انسانی قانون اور بین الاقوامی انسانی حقوق کے قانون کے تحت انہیں تحفظ حاصل ہونا چاہیے ۔ خط لکھنے والے سینیٹرز میں ایڈ مارکی، ایلزبتھ وارن، کرس وان ہولن اور جیف مرکلی شامل ہیں۔