میڈرڈ؍ روم، 26 ستمبر (یو این آئی) اٹلی اور اسپین نے اسرائیلی محاصرہ توڑ کر غزہ امداد پہنچانے کیلئے سرگرم گلوبل صمود فلوٹیلا پر ڈرون حملوں کے بعد اس کی حفاظت کیلئے بحری جہاز تعینات کر دیے ۔ اس اقدام سے اسرائیل کے ساتھ کشیدگی میں اضافہ ہو سکتا ہے ۔ ڈان نیوز میں شائع خبر رساں ادارے رائٹرز کی رپورٹ کے مطابق گلوبل صمود فلوٹیلا تقریباً 50 سول کشتیوں کے ذریعے اسرائیل کی بحری ناکہ بندی توڑنے کی کوشش کر رہا ہے ، ان کشتیوں پر وکلا، ارکان پارلیمنٹ اور کارکنان موجود ہیں جن میں سویڈن کی ماحولیاتی کارکن گریٹا تھنبرگ بھی شامل ہیں۔ اٹلی کی وزارتِ دفاع نے کہا کہ فلوٹیلا کو نشانہ بنائے جانے کے چند گھنٹے بعد ہی بدھ کو ایک فریگیٹ روانہ کی گئی تھی، ڈرون حملے کا نشانہ بننے والے جہاز کو بعد میں کسی اور جہاز سے بدل دیا جائے گا۔ وزیرِ دفاع گوئیڈو کروسیٹو نے پارلیمنٹ کے ایوان بالا کو بتایا کہ ‘یہ جنگی اقدام نہیں ہے ، یہ کوئی اشتعال انگیزی نہیں ہے ، یہ انسانیت کا عمل ہے ، جو ایک ریاست کی اپنے شہریوں کیلئے ذمہ داری ہے ‘۔ اٹلی کی وزارتِ خارجہ کے مطابق بیلجیئم، فرانس اور دیگر یورپی ممالک نے اپنے شہریوں کی مدد کیلئے اٹلی سے تعاون کی درخواست کی تھی۔
