موہالی،9جولائی(سیاست ڈاٹ کام)ریپر اور گلوکار یو یو ہنی سنگھ اور ٹی سیریز کے مالک بھوشن کمار کے خلاف گانے میں خواتین کے خلاف فحش الفاظ کا استعمال کرنے کے خلاف موہالی تھانے میں معاملہ درج کیاگیاہے ۔ضلع پولیس سینئر سپرنٹنڈنٹ چرنجیت سنگھ بھلر نے آج یہاں اس بات کی تصدیق کرتے ہوئے بتایا کہ دونوں کے خلاف بھادنس کی دفعہ 294 اور 509 کے تحت معاملہ درج کیاگیاہے ۔دونوں کوپوچھ تاچھ کے لئے جلد ہی طلب کیا جائے گا۔انہوں نے کہا کہ گانے کی زبان فحش پائی گئی اور دونوں کے خلاف جانچ کے بعد ہی معاملہ درج کیا گیا ہے ۔پنجاب خواتین کمیشن کی صدر منیشا گولاٹی نے اس معاملے کا نوٹس لیتے ہوئے پولیس ڈائریکٹر دنکر گپتا کو کارروائی کے لئے خط لکھا ہے ۔واضح رہے کہ قابل اعتراض زبان کے استعمال کے سلسلے میں اکثر تنازعہ میں رہے سنگر کی ایک ایلبم میں مکھنا نام کا گانا ہے جس میں فحش زبان کا استعمال کیاگیا ہے ۔اس سے پہلے سال 2013 میں بھی وہ تب تنازعہ میں آئے تھے جب ان کے ایک گانے میں ‘میں بلاتکاری ہوں’ الفاظ کا استعمال کیاگیاتھا۔
