بیونس آئرس۔ کیوبا کے گوانتامو بے میں امریکی نیوی بیس کے سابق کمانڈر کو شہریوں کی ہلاکتوں کی تفتیش کے دوران جھوٹے بیانات دینے اور انصاف میں رکاوٹ ڈالنے پر 2 سال قید کی سزا سنا دی گئی۔ خبر ایجنسی ’اے ایف پی‘ کی رپورٹ کے مطابق امریکہ کے ڈسٹرکٹ جج ٹموتھی کوریگن نے سابق کیپٹن کو فلوریڈا کی جیل میں 2 سال قید رکھنے کی سزا دی۔ قبل ازیں امریکی نیوی کے 53 سالہ ریٹائرڈ کیپٹن جان نیٹلیٹن کو رواں برس جنوری میں ایک شہری کرسٹوفر ٹور کی ہلاکت سے متعلق کئی جرائم میں سزا سنائی گئی تھی۔ رپورٹ کے مطابق امریکہ کی دہشت گردی کے خلاف جنگ کے دوران 9/11 حملوں کی منصوبہ بندی میں ملوث افراد کو قید کرنے کے لیے بنائی گئی جیل کے ملازم 42 سالہ کرسٹوفر ٹور 11 فروری 2015 کو مردہ پائے گئے تھے۔ ٹرائل کے دوران پیش کیے گئے شواہد میں کہا گیا تھا کہ جیل ملازم نے اپنی ہلاکت سے قبل امریکی کیپٹن نیٹلیٹن پر ان کی اہلیہ سے تعلقات رکھنے کا الزام عائد کیا تھا۔ اس حوالے سے بتایا گیا تھا کہ دونوں کے درمیان 9 جنوری کی رات کو آفیسرز کلب اور بعد میں نیٹلیٹن کے گھر میں جھگڑا ہوا تھا۔ بعد ازاں جیل ملازم اگلے روز لاپتہ ہوگئے تھے اور ان کی نعش گوانتانامو بے کے دریا سے ملی تھی۔ کیپٹن نیٹلیٹن کو کرسٹوفر ٹور کی ہلاکت سے متعلق تفتیش میں غلط بیانی کا مجرم قرار دیا گیا۔ امریکی نیوی کے سابق کیپٹن کو مختلف جرائم میں سزا سنائی گئی جس میں انصاف میں رکاوٹ کھڑی کرنے پر دو، حقائق چھپانے پر ایک، جھوٹے ریکارڈ پر ایک اور جھوٹا بیان دینے پر دو جرم ثابت ہونے پر قید سنائی گئی۔