پنجی: کانگریس کے سینئرقائد اور سابق مرکزی وزیر پی چدمبرم نے اتوار کو کہا کہ بی جے پی نے جو زہر بویا تھا وہی کاٹ رہی ہے اور یہ اسی حقیقت سے ظاہر ہے کہ اس کے قائدین نے پارٹی کو چھوڑنا شروع کر دیا ہے۔پی چدمبرم نے پریس کانفرنس سے خطاب کرتے ہوئے کہا کہ کانگریس کے امیدوار متحد ہیں اور پارٹی کو ریاست میں ایک مستحکم حکومت بنانے کے لیے اکثریت حاصل کرنے کا بھروسہ ہے۔ انہوں نے کہا کہ ’گوا کی تاریخ کو دیکھتے ہوئے یہ اہم ہے۔ کانگریس پارٹی متحد ہوکر لڑے گی اور ہمیں امید ہے کہ یہاں کے عوام ہم پر یقین کریں گے‘۔بیٹنگ ریٹریٹ تقریب کی دھنوں کی فہرست سے اس بار گاندھی جی کے پسندیدہ عیسائی بھجن ’ابائیڈ وِد می‘ کو ہٹانے پر ردعمل ظاہر کرتے ہوئے پی چدمبرم نے کہا کہ اس پیشرفت سے ملک کے لوگوں کو چوٹ پہنچی ہے۔
انہوں نے کہا کہ ’یہ دْھن 1950 سے ہر سال سالانہ تقریب میں بجائی جاتی ہے۔ اس سیکولر بھجن کو گاندھی جی نے مقبول بنایا تھا۔ مجھے امید ہے کہ بہتر سمجھ قائم رہے گی اور اس بھجن کو بحال کر دیا جائے گا‘۔ایک سوال کے جواب میں انہوں نے کہا کہ وزیر اعلیٰ کے چہرے کا اعلان تمام امیدواروں کو اعتماد میں لینے کے بعد کیا جائے گا۔ یہ طے کیا جائے گاکہ اس کا اعلان ابھی کرنا ہے یا بعد میں‘۔ انہوں نے دعویٰ کیا کہ گوا میں کانگریس پارٹی کو ملنے والی حمایت کو دیکھ کر انھیں یقین ہے کہ عوام انھیں مستحکم حکومت کے لیے اکثریت دیں گے۔