آگرہ،24اکتوبر(یو این آئی) بی جے پی تلنگانہ کے سابق ریاستی ترجمان میر فراسَت علی باقری نے آج گورنر بہار عارف محمد خان کی جانب سے درگاہ حضرت قاضی سید نوراللہ شوستری (شہیدِ ثالثؒ) آگرہ اتر پردیش میں سالانہ عرس کے موقع پر چادر پیش کی۔ اس موقع پر گورنر بہار عارف محمد خان نے اپنے پیغام میں کہا کہ میں حضرت قاضی سید نوراللہ شوستری (شہیدِ ثالثؒ) کے تمام عقیدت مندوں کو ان کے سالانہ عرس کی مبارکباد پیش کرتا ہوں۔ میں اس عظیم صوفی بزرگ کو خراجِ عقیدت پیش کرتے ہوئے ’چادر‘کے ذریعے انسانیت، محبت اور رواداری کے پیغام کو سلام پیش کرتا ہوں۔ ہندوستان کی شناخت اس کی متنوع ثقافتوں میں اتحاد ہے ۔ مختلف مسالک، مذاہب اور برادریوں کا باہمی احترام اور ہم آہنگی ہی ہماری اصل طاقت ہے ۔ اس موقع پر میر فراست علی باقری نے کہا کہ گورنر عارف محمد خان کی سوچ، صوفیا کرام کے فلسفے ، بصیرت اور جامع ترقی کے نظریہ پر مبنی ہے ۔انہوں نے کہا کہ عارف محمد خان کا نظریہ اور صوفی کلچر پر مبنی ویژن ہندوستان کو ’وشو گرو‘ بنانے کا مؤثر ’منتر‘ ہے ۔
