تلنگانہ میں کورونا کیسس میں اضافہ پر تشویش، موثر علاج کی سہولتوں اور عوام سے احتیاطی تدابیر کی اپیل
حیدرآباد۔ گورنر تلنگانہ و پوڈوچیری ڈاکٹر ٹی سوندرا راجن نے وزیر صحت ای راجندر سے فون پر ربط قائم کرتے ہوئے تلنگانہ میں کورونا وائرس کیسس میں اضافہ کی صورتحال پر معلومات حاصل کیں۔ گورنر نے پازیٹیو کیسس میں اضافہ پر تشویش کا اظہار کرتے ہوئے وزیر صحت سے تازہ کیسس کی صورتحال اور کیسس پر قابو پانے کیلئے حکومت کی جانب سے کئے جارہے احتیاطی اقدامات اور دواخانوں میں علاج کی سہولتوں کے بارے میں استفسار کیا۔ وزیر صحت نے گورنر کو حکومت کی جانب سے ٹسٹنگ سہولتوں میں اضافہ، مریضوں اور ان سے ربط میں آنے والے افراد کو باخبر رکھنے کیلئے نئے ایپ متعارف کرنے اور کوویڈ ہاسپٹلس میں علاج کی سہولتوں میں بہتری کی تفصیلات بیان کی۔ گورنر نے کئی دواخانوں میں مریضوں کو وینٹلیٹرس پر رکھے جانے پر دکھ کا اظہار کرتے ہوئے اس بارے میں تفصیلات فراہم کی ہیں۔ گورنر نے کہا کہ وائرس کے جلد پتہ چلانے اور فوری علاج کے آغاز کے ذریعہ مریضوں کی زندگی بچائی جاسکتی ہے۔ انہوں نے عوام سے اپیل کی کہ وہ احتیاطی تدابیر پر سختی سے عمل کریں خاص طور پر ماسک کے استعمال اور سماجی دوری کو لازمی کرلیں۔ انہوں نے عوام کے ہجوم کی شکل میں جمع ہونے کو نامناسب قرار دیا۔ گورنر نے کہا کہ وقفہ وقفہ سے ہاتھ دھونے اور سنیٹائزر کے استعمال سے کورونا سے بچا جاسکتا ہے۔ گورنر نے پوڈوچیری سے فون پر راجندر سے ربط قائم کیا۔ گورنر زائد ذمہ داریوں کے تحت پوڈوچیری میں قیام پذیر ہیں۔ انہوں نے خصوصی ایپ کے متعارف کرنے پر محکمہ صحت کے عہدیداروں کی ستائش کی۔ انہوں نے کہا کہ متاثرہ افراد اور ان سے ربط میں آنے والوں کو قریبی ٹسٹنگ مراکز پہنچانے میں یہ ایپ مدد گار ثابت ہوگا۔ انہوں نے گرما کے پیش نظر ٹیکہ اندازی میں تیزی پیدا کرنے کا مشورہ دیا۔ گورنر سوندرا راجن نے عوام سے اپیل کی کہ وہ گرما کی شدت کو دیکھتے ہوئے احتیاط کریں تاکہ سن اسٹروک اور دیگر عوارض سے بچا جاسکے۔ گورنر سوندرا راجن ریاست میں کورونا کی صورتحال پر مسلسل نظر رکھے ہوئے ہیں اور عہدیداروں کو بروقت ہدایات جاری کررہی ہیں۔