کولکوتا۔ یکم جنوری(سیاست ڈاٹ کام)نئے سال کے موقع پر اپنے ٹوئیٹ کی وجہ سے سخت تنقیدوں کے بعد گورنر جگدیپ دھنکر نے اپنے ٹوئیٹ کو ڈیلیٹ کردیا ہے ۔گورنر نے نئے سال کے موقع پر اپنے پیغام کو ریکارڈ کرنے کیلئے راج بھون کی لائبریری کی جس میز پر بیٹھے تھے اس کی تصویر کو پوسٹ کرتے ہوئے لکھا تھاکہ میں راج بھون کی تاریخی لائبریری کی اس میز پربیٹھ کر ریاست کے عوام کیلئے نئے سال کا پیغام ریکارڈ کرارہا ہوں جس پر بیٹھ کر وائسرائے ہند لارڈ کرزن نے 1905میں تقسیم بنگال کے معاہدے پر دستخط کیا تھا۔پہلی مرتبہ بنگال کی تقسیم کے خلاف بنگال کے دانشوروں نے بڑے پیمانے پر تحریک چلائی تھی۔رابند ناتھ ٹیگور نے اس وقت ایک نظم بنگلار ماٹی ڈبنگلار جول لکھا تھا اور 27ستمبر 1905کو ٹیگورنے رکھشا بندھن کا اہتمام کیا تھا۔دھنکر کا ٹوئیٹ سامنے آنے کے بعد سیاسی،سماجی اور اکیڈمک حلقے سے زبردست تنقید کی شروعات ہوگئی تھی۔وزیراعلیٰ ممتا بنرجی نے بنگال کے عوام کو مذہب کی بنیاد پر تقسیم کرنے کی کوششوں پرتنقید کرتے ہوئے ٹیگور کی نظم کو پوسٹ کیا ہے ۔