ممبئی ، 25 اگست (ایجنسیز) بالی ووڈ کے معروف اداکار گووندا اور سنیتا آہوجا کی علیحدگی کی خبروں پر بیٹی کا ردعمل سامنے آیا ہے۔ گزشتہ دنوں یہ خبریں سامنے آئیں کہ سوشل میڈیا پر سال بھر متعدد بار وائرل ہونے والی گووندا اور سنیتا کی طلاق کا معاملہ اب آخر کار عدالت تک پہنچ چکا ہے۔ جس پر مداحوں اور سوشل میڈیا صارفین میں تشویش کی لہر دوڑ گئی کہ اس بار بھی معاملہ صرف سنسنی پھیلانے والی خبر تک ہے یا حقیقت میں ایسا کچھ ہورہا ہے۔ اب گووندا اور سنیتا کی بیٹی ٹینا کا والدین کی طلاق کی خبروں پر بیان سامنے آیا ہے۔ ہندوستان ٹائمز سے بات کرتے ہوئے ٹینا آہوجا نے مداحوں کی مسلسل حمایت پر شکریہ ادا کیا اور اپنے والدین کی طلاق کے دعووں کی بھی تردید کی۔ ٹینا نے کہا، ’’یہ سب افواہیں ہیں۔‘‘ یہ پوچھے پر کہ جب ایسی خبریں بار بار سامنے آتی ہیں تو وہ کیا محسوس کرتی ہیں، اداکارہ نے جواب دیا کہ وہ ان افواہوں پر توجہ نہیں دیتیں۔ ٹینا نے بتایا کہ گووندا فی الحال ملک میں نہیں ہیں۔ انہوں نے مزید کہا، ’’میں ایک خوبصورت خاندان کے ساتھ خوش قسمت محسوس کرتی ہوں اور میں میڈیا، مداحوں اور چاہنے والوں کی تمام تر فکرمندی، محبت اور حمایت کیلئے واقعی شکر گزار ہوں۔‘‘
