ڈھاکہ: اقوام متحدہ کے سکریٹری جنرل انتونیو گوٹریس نے میانمار میں مظالم کے شکار روہنگیا برادری کے لوگوں کو پناہ دینے پر بنگلہ دیش کی توصیف و ستائش کی ہے ۔بنگلہ دیش کے وزیر خارجہ ڈاکٹر اے کے عبد المومن کے نئے سال کے پیغام کے جواب میں مسٹر گوٹریس کے لکھے گئے مکتوب میں کہا گیا کہ اقوام متحدہ بنگلہ دیش کے ساتھ ہے اور وہ روہنگیا بحران کے اجتماعی حل کے لئے بین الاقوامی حمایت کو متحرک کرے گا۔خیال رہے ڈاکٹر عبدالمومن نے اپنے خط میں روہنگیا بحران کے مستقل حل اور حوالگی کے حوالے سے اقوام متحدہ کے زیادہ فعال کردار ادا کرنے پر زور دیا ہے ۔مسٹر گوٹریس نے اقوام متحدہ کی توقعات کی حمایت کرنے پر بنگلہ دیش کی حکومت کا شکریہ ادا کیا ۔
