ریاض: معروف سعودی ناول نگار عبدالرحمٰن منیف کی 90 ویں سالگرہ کے موقع پر سرچ انجن گوگل نے اپنا ڈوڈل ان کے نام کردیا۔سرچ انجن گوگل نے سعودی عرب کے ناول نگار عبدالرحمن منیف کی 90 ویں سالگرہ کے موقع پر گوگل ڈوڈل جاری کیا ہے ۔گوگل کا کہنا ہیکہ سعودی ناول نگار، ناقد، دانشور اور صحافی عبدالرحمن کی یاد میں ڈوڈل جاری کیا گیا ہے۔ منیف سے متعلق گوگل کا ڈوڈل متحدہ عرب امارات، سعودی عرب، اردن، عراق، مصر، لیبیا، الجزائر اور مراقش میں دیکھا گیا۔گوگل نے سعودی ناول نگار کو خراج عقیدت پیش کرنے کیلئے مختصر سا پیغام بھی جاری کیا جس میں تحریر تھا، عبدالرحمن کا یوم پیدائش مبارک، آپ نے عربی ادب کی گرانقدر خدمات انجام دیں، عربی ادب میں آپ کے تعاون، سماجی و سیاسی مسائل کے تجزیہ کیلئے آپ کا شکریہ۔سعودی ناول نگار عبدالرحمن 1933 میں اردنی دارالحکومت عمان میں پیدا ہوئے ، ان کے والدین سعودی تھے ۔انہوں نے ابتدائی اور یونیورسٹی کی سطح کی تعلیم اردن میں حاصل کی، 1952میں قانون کی تعلیم کیلئے بغداد یونیورسٹی گئے اور پھر قاہرہ یونیورسٹی سے اعلیٰ تعلیم حاصل کی۔1961میں یونیورسٹی آف بلغراد سے پٹرولیم اکنامکس میں پی ایچ ڈی کی ڈگری حاصل کی، عملی زندگی کے آغاز میں بغداد میں آئل انڈسٹری میں ماہر اقتصادیات کے طور پر کام کیا۔شام اور اوپیک میں تیل کی وزارتوں کیلئے کام کیا۔عراق میں قیام کے دوران وہ ایک ماہنامہ کے مدیر رہے ، انہیں بچپن سے ہی ادب اور لکھنے سے دلچسپی تھی۔
