تعمیرات کو روکنے کی ہدایت، وقف بورڈ کی درخواست پر چیف جسٹس کے احکام
حیدرآباد: تلنگانہ ہائی کورٹ نے گٹلہ بیگم پیٹ کی اوقافی اراضی پر غیر مجاز تعمیرات کو روکنے کی ہدایت دیتے ہوئے حکم التواء جاری کیا ہے۔ وقف بورڈ کی جانب سے دائر کردہ درخواستوں کی سماعت کے بعد چیف جسٹس راگھویندر سنگھ چوہان نے اوقافی اراضی کا جوں کا توں موقف برقرار رکھنے کی ہدایت دی۔ فریقین کو ہدایت دی گئی ہے کہ وہ عدالت کے قطعی فیصلہ تک کوئی تعمیری کام انجام نہ دیں۔ گٹلہ بیگم پیٹ کی اراضی کے تحفظ کے لئے صدرنشین وقف بورڈ محمد سلیم نے خصوصی دلچسپی کا مظاہرہ کرتے ہوئے قابضین کے خلاف مقدمات درج کرائے تھے۔ عدالت میں مقدمہ زیر دوران ہونے کے بعد بعض قابضین تعمیری کاموں میں مصروف تھے جس پر وقف بورڈ نے عدالت کا دروازہ کھٹکھٹایا۔ اس مقدمہ میں سینئر ایڈوکیٹ کی خدمات حاصل کی گئیں۔ محمد سلیم نے کہا کہ گٹلہ بیگم پیٹ کی قیمتی اراضی پر غیر سماجی عناصر قبضہ کی کوشش کر رہے ہیں۔ قبضوں کی برخواستگی کے سلسلہ میں وقف بورڈ نے کئی مرتبہ پولیس اور ریونیو حکام کی مدد سے انہدامی کارروائی انجام دی۔ محمد سلیم نے کہا کہ ہائی کورٹ کے ذریعہ وقف اراضی کا ہر ممکن تحفظ کیا جائے گا۔ انہوں نے کہا کہ اراضیات سے متعلق محتلف عدالتوں میں زیر دوران مقدمات کی عاجلانہ یکسوئی کیلئے وکلاء کو ہدایت دی گئی ہے۔ انہوں نے کہا کہ رجسٹریشن کو روکنے کیلئے چیف منسٹر کے چندر شیکھر راؤ نے احکامات جاری کئے ۔ محمد سلیم نے ہائی کورٹ کے اسٹانڈنگ کونسلس کو ہدایت دی ہے کہ وقف سے متعلق مقدمات میں خصوصی دلچسپی لیں۔