پونے ۔14 اکٹوبر (سیاست ڈاٹ کام ) ہندوستانی ٹیم نے ٹسٹ کرکٹ میں آسٹریلیا کی اپنے ہوم گراؤنڈ پر سب سے زیادہ سیریز میں مسلسل فتوحات کا ریکارڈ توڑ دیا۔ ہندوستان نے یہ ریکارڈ جنوبی افریقہ کو تین ٹسٹ میچوں کی سیریز کے دوسرے ٹسٹ میچ میں شکست دے کر توڑا۔ ویراٹ کوہلی کی قیادت میں ہندوستان ٹیم اس وقت کامیابیوں کی راہ پر گامزن ہے جبکہ اسے اپنے گھر میں دنیا کا سب سے مشکل حریف کہا جائے تو غلط نہ ہوگا اور یہی وجہ ہے اس نے جنوبی افریقہ کے خلاف ٹسٹ سیریز میں ثابت کر دکھایا۔ ہندوستانی ٹیم نے پہلے ٹسٹ میچ میں جنوبی افریقہ کو 203 رنز کے بڑے فرق سے شکست دی تھی تاہم دوسرے میچ میں اس نے مہمان ٹیم کو مکمل طور پر بے بس کرتے ہوئے اننگز اور 137 کے سے شکست دی۔علاوہ ازیں اس فتح کے ساتھ ہی ہندوستان نے ہوم گراؤنڈ پر مسلسل 11 سیریز جیتنے کا عالمی ریکارڈ بھی اپنے نام کرلیا۔ اس سے قبل یہ ریکارڈ آسٹریلیا جیسی مضبوط ٹیم کے پاس تھا جو 2 مرتبہ 10 مسلسل سیریز میں کامیابی حاصل کرچکی ہے۔ آسٹریلیا نے نومبر 1994 سے جنوری 2001 تک مسلسل 10 ہوم سیریز میں فتح کا ریکارڈ قائم کیا تھا جبکہ جولائی 2004 سے دسمبر 2008 تک اس ایک مرتبہ پھر 10 مسلسل ہوم سیریز جیت کر اپنا ہی ریکارڈ برابر کیا۔دوسری جانب کپتان کوہلی نے بھی اس فتح کے ساتھ انفرادی ریکارڈ اپنے نام کرلیا جبکہ اپنے ابتدائی 50 میچوں میں وہ سابق کپتان دھونی سے بہتر دکھائی دیتے ہیں۔ ہندوستانی کپتان ویراٹ کوہلی کی قیادت میں ہندوستان کی یہ 30ویں کامیابی ہے جبکہ ابتدائی 50 میچوں میں ہندوستان کے کامیاب ترین کپتان مہیندر سنگھ دھونی اپنی ٹیم کو صرف 26 میچوں میں ہی کامیابی دلواسکے تھے۔ بطور کپتان اپنے ابتدائی 50 میچوں میں سب سے زیادہ فتوحات دلوانے والوں کپتانوں میں کوہلی تیسرے نمبر پر ہیں۔ اس فہرست میں آسٹریلیا کے اسٹیو وا سرفہرست ہیں جنہوں نے 37 مرتبہ اپنی ٹیم کو کامیابی سے ہمکنار کیا ۔
