نئی دہلی،31 دسمبر (یواین آئی ) نئے سال کا آغاز ہندوستانی کرکٹ کے مداحوں کے لیے ایک بڑے دھماکے سے ہونے جا رہا ہے ۔ جہاں ایک طرف ہندوستانی ٹیم نیوزی لینڈ کے خلاف ونڈے سیریز کی تیاریوں میں مصروف ہے ، وہیں بی سی سی آئی کی سخت پالیسی کے تحت شبھمن گل، رویندر جڈیجہ اور کے ایل راہول جیسے بڑے نام اپنی ریاستی ٹیموں کی نمائندگی کے لیے وجے ہزارے ٹرافی کے میدان میں اتریں گے ۔ ہندوستانی ٹیم کے اسٹارکھلاڑیوں نے اپنی دستیابی کے بارے میں اپنی اپنی کرکٹ اسوسی ایشنزکو مطلع کردیا ہے ۔ہندوستانی ونڈے اور ٹسٹ کپتان شبھمن گل3 اور6 جنوری کو جے پور میں بالترتیب سکم اورگوا کے خلاف ایکشن میں نظر آئیں گے ۔ اس کے فوراً بعد وہ نیوزی لینڈ کے خلاف سیریز کے لیے قومی ٹیم میں شامل ہوجائیں گے ۔ جڈیجہ 6 اور8 جنوری کو سرویسز اورگجرات کے خلاف میچز میں اپنی ٹیم کی طاقت بڑھائیں گے ۔ ذرائع کے مطابق راہول احمد آباد میں تریپورہ اور راجستھان کے خلاف میچز میں اپنی فارم اور فٹنس کا مظاہرہ کریں گے ۔ مرض سے چھٹکارا پانے کے بعد بائیں ہاتھ کے جارحانہ اوپنر یشسوی جیسوال ممبئی کی ٹیم میں شامل ہو چکے ہیں اور توقع ہے کہ وہ گوا کے خلاف میدان میں اتریں گے ۔ ویراٹ کوہلی، جنہوں نے پہلے ہی دو میچزکھیلے ہیں،6 جنوری کو دوبارہ دہلی کی ٹیم کا حصہ بنیں گے ۔ دلچسپ بات یہ ہے کہ دہلی کی قیادت رشبھ پنت کررہے ہیں، جنہوں نے ٹورنمنٹ کے تمام میچزکھیلنے کا عزم کر رکھا ہے ۔