نئی دہلی۔5اپریل (سیاست ڈاٹ کام )ٹینس کے موجودہ تین سرکردہ کھلاڑیوں سربیا کے نوواک جوکووچ، اسپین کے رافیل نڈال اور سوئٹزرلینڈ کے راجر فیڈرر کورونا وائرس کے خطرے کی وجہ سے اپنے اپنے ممالک میں عائد لاک ڈاؤن کے درمیان گھر کے احاطے میں ہی ٹینس کھیل کر وقت بتا رہے ہیں اور خود کو مصروف رکھے ہوئے ہیں۔اے ٹی پی نے اپنے تمام ٹورنامنٹوں کو فی الحال ملتوی کر رکھاہے ۔عالمی نمبر ایک کھلاڑی جوکووچ گھر میں رہ کر خاندان والوں کے ساتھ وقت گزار رہے ہیں۔جوکووچ نے ٹوئٹر پر ایک ویڈیو شئیرکیا ہے جس میں وہ اپنے گھر کے اندر ٹینس کھیلتے ہوئے نظر آ رہے ہیں۔ انہوں نے لکھا ہے کہ مسابقت کبھی ختم نہیں ہوتی۔غور طلب ہے کہ اس سال اب تک ایک گرینڈ سلیم ٹورنامنٹ آسٹریلین اوپن کا انعقاد ہوا ہے جسے جوکووچ نے جیتا تھا۔دوسرا گرینڈ سلیم فرانسیسی اوپن ملتوی کر دیا گیا ہے جبکہ تیسرے گرینڈ سلیم ومبلڈن کو منسوخ کر دیا گیا ہے ۔دنیا کے دوسرے نمبر کے کھلاڑی نڈال اپنی بہن ماریا بیل کے ساتھ گھر کے پچھلے حصے میں ٹینس کھیلتے نظر آ رہے ہیں۔انہوں نے اس کا ایک ویڈیو سوشل میڈیا پر بھی پوسٹ کیا ہے ۔انہوں نے دو کرسیوں کو جوڑ کر نیٹ بنا رکھا ہے ۔دنیا کے چوتھے نمبر کے کھلاڑی فیڈرر نے اپنے ٹویٹر پر ایک ویڈیو پوسٹ کیا ہے جس میں وہ گھر میں رہ کر ‘ٹرک شاٹ’ کی پریکٹس کر رہے ہیں۔فیڈرر نے کیپشن میں مضحکہ خیز طور پر لکھا ہے کہ وہ اس بات کا یقین کر رہے ہیں کہ ٹرک شاٹ کس طرح مارا جاتا ہے اور وہ اسے بھولے تو نہیں ہیں۔ان تین سرکردہ کھلاڑیوں نے کل 56 گرینڈ سلیم ٹائٹل جیتے ہیں جس میں فیڈرر کے نام 20، نڈال کے نام 19 اور جوکووچ کے نام 17 گرینڈ سلیم ٹائٹل ہیں۔
