کورونا وائرس سے بچنے کے لیے حکمت عملی ، ٹی ایس و اے پی گیاس ڈیلرس اسوسی ایشن کا بیان
حیدرآباد۔20اپریل(سیاست نیوز) پکوان گیاس گھر کے اندر نہیں لائی جائے گی بلکہ گھر کے باہر ہی حوالہ کی جائے گی اور پکوان گیاس سلنڈرس کو صارفین کے حوالہ کرنے سے قبل جراثیم کش ادویات کا استعمال کرتے ہوئے صاف کیاجائے گا۔گیاس سلنڈرس کی سربراہی کرنے والی ایجنسیوں کی جانب سے ریاست تلنگانہ وآندھرا پردیش میں اس بات کا فیصلہ کیا گیا ہے کہ اب تک جس انداز میں گیاس کی ڈیلیوری انجام دی جاتی تھی اس طرح سے گیاس نہیں لائی جائے گی بلکہ اپارٹمنٹ یا مکان کے باب الداخلہ پر ہی گیاس حوالہ کردی جائے گی۔کورونا وائرس کی وباء سے متاثرہ مریضوں کی تعداد کو دیکھتے ہوئے گیاس سربراہ کرنے والی ایجنسیوں نے اپنے عملہ کو ہدایات جاری کی ہیں کہ وہ گھروں میں داخل نہ ہوں اور باب الداخلہ یا اپارٹمنٹ کی گیٹ پر ہی گیاس حوالہ کردیں تاکہ وائرس کے خدشات کو روکا جاسکے اور احتیاط کو یقینی بنایا جائے ۔بھارت گیاس‘ انڈین گیاس اور ہندستان پٹرولیم کی گیاس سربراہ کرنے والی ایجنسیوں نے یہ فیصلہ کیا ہے۔تلنگانہ آندھرا گیاس ڈیلرس اسوسیشن کے صدر مسٹر شرون راؤنے بتایا کہ دونوں ریاستو ںمیں تیزی سے پھیل رہے کورونا وائرس کو دیکھتے ہوئے ڈیلرس نے فیصلہ کیا ہے کہ عملہ اور گیاس لانے والی ٹرالیوں اور سلنڈرس کو جراثیم کش ادویات سے صاف کرتے ہوئے مکان کے باب الداخلہ پر ہی حوالہ کیا جائے سابق میں کئی مکانات میں ڈیلیوری کرنے والے عملہ کی جانب سے گیاس باورچی خانہ تک پہنچاتے ہوئے سلنڈر تبدیل کیا جاتا تھا لیکن اب اس عمل پر پابندی عائد کردی گئی ہے کیونکہ سلنڈر پہنچانے کیلئے ڈیلیوری عملہ کئی علاقوں اور گھروں تک پہنچتا ہے اسی لئے شہریوں کو اور عملہ کو محفوظ رکھنے کیلئے یہ اقدام کیا گیا ہے۔ڈیلرس نے صارفین سے اپیل کی کہ وہ اس فیصلہ کا احترام کرتے ہوئے تعاون کریں۔
