بی ایس پی سربراہ مایاوتی کی اپیل
لکھنؤ: بہوجن سماج پارٹی (بی ایس پی) کی سربراہ مایاوتی نے ہاتھرس اجتماعی عصمت دری کے معاملے کی تحقیقات مرکزی تفتیشی بیورو (سی بی آئی) سے کرانے کا مطالبہ کیا ہے اور صدر جمہوریہ رام ناتھ کووند سے متاثرہ خاندان کو انصاف دلانے کیلئے مداخلت کی اپیل کی ہے ۔ مایاوتی نے ہفتہ کو ٹویٹ کیا ‘‘ ہاتھرس کے اجتماعی عصمت دری معاملے کے تعلق سے پورے ملک میں زبردست غصہ ہے ۔ اس کی ابتدائی تحقیقات سے عوام مطمئن نہیں ہیں ۔ اس معاملے کی سی بی آئی یا پھر سپریم کورٹ کی نگرانی میں جانچ ہونی چاہئے ، بی ایس پی کی یہی مانگ ہے ۔ انہوں نے کہا کہ ‘‘ ملک کے صدر یوپی سے آئے ہیں اوروہ ایک دلت ہونے کے ناطے بھی اس معاملے میں بالخصوص سرکار کے غیر انسانی رویے کو مد نظر رکھ کر متاثرہ کے خانہ افراد کو انصاف دلانے کے لئے مداخلت کریں ‘‘۔ واضح رہے کہ ہاتھرس میں متاثرہ کی موت کے بعد اپوزیشن بالخصوص کانگریس ، سماج وادی پارٹی (ایس پی) اور عام آدمی پارٹی (عآپ ) سڑکوں پر ہیں ۔ بی ایس پی سربراہ اپنے بیانات کے ذریعہ ہاتھرس واقعہ پر برہمی کا اظہار کرتی رہی ہیں۔
