جوہانسبرگ۔9 اگسٹ (سیاست ڈاٹ کام ) جنوبی افریقہ کے کامیاب ترین بیٹسمینوں میں سے ایک ہاشم آملہ نے ہر طرزکی بین الاقوامی کرکٹ سے سبکدوشی کا اعلان کردیا ہے اور جس کا فوری اطلاق ہوگا۔ گزشتہ چند سال کے دوران گرتی ہوئی فارم اور بڑھتی ہوئی عمر کے سبب آملہ نے عالمی کرکٹ کو خیرباد کہہ دیا تاہم وہ ڈومیسٹک کرکٹ کھیلنے کا سلسلہ جاری رکھیں گے۔انہوں نے سبکدوشی کا اعلان کرتے ہوئے کہا کہ میں سب سے پہلے خدواندکریم کا شکر ادا کرتا ہوں جس نے مجھے جنوبی افریقی ٹیم کا حصہ بنایا جو کسی اعزاز سے کم نہ تھا، اس سفر کے دوران میں نے کئی سبق سیکھے اور کئی نایاب دوست بنائے۔ 124 ٹسٹ اور181 ونڈے میچوں میں جنوبی افریقہ کی نمائندگی کرنے والے آملہ نے کہا میں اپنے والدین کی دعاؤں، محبت اور مکمل تعاون پر ان کا شکر ادا کرتا ہوں، ان کی بدولت میں اتنے سال تک افریقہ کے لیے کھیل سکا، اس کے ساتھ ساتھ میں اپنی اہلخانہ، دوستوں، کھلاڑیوں اور سب لوگوں کا شکریہ ادا کرتا ہوں۔ عظیم بیٹسمین نے کہا کہ مشکل وقتوں میں مداحوں نے ہمیشہ مجھے قوت بخشی اور کامیابی پر ہمارے ساتھ جشن منایا۔ ہاشم آملہ نے اپنے 15سالہ کیریئر کا آغاز نومبر 2004 میں ہندوستان کے خلاف ٹسٹ سے کیا لیکن انہیں اپنا ون ڈے اور ٹی20 کیریئر شروع کرنے میں مزید 4 سال لگے۔ انہوں نے اپنے ٹسٹ کیریئر میں 28 سنچریوں کی مدد سے 46.64 کی اوسط سے 9,282 رنز اسکور کیے جبکہ ونڈے کرکٹ میں 27 سنچریوں اور 39 نصف سنچریوں کی مدد سے8,113 رنز بنائے ۔ وہ ٹسٹ کرکٹ میں جنوبی افریقہ کی جانب سے ٹرپل سنچری بنانے والے واحد کھلاڑی ہیں۔جو انہوں نے روزہ کی حالت میں انگلینڈ کے خلاف بنائی تھی۔انہیں ٹسٹ کرکٹ میں جنوبی افریقہ کی قیادت کا اعزاز بھی حاصل ہوا لیکن ٹیم کی مسلسل ناکامیوں کے سبب انہوں نے خود ہی قیادت چھوڑ دی تھی۔گزشتہ کچھ سال سے ان کی کارکردگی مسلسل گرتی جا رہی تھی اور وہ حال ہی میں ختم ہونے والے ورلڈ کپ میں بھی زیادہ اچھی کارکردگی نہ دکھا سکے اور 7 اننگز میں صرف 203 رنز بنا سکے۔
