کولکاتا: کولکاتا نائٹ رائیڈرز کے نوجوان گیند باز ہرشت رانا کی تعریف کرتے ہوئے جنہوں نے سن رائزرس حیدرآباد کے ہاتھوں سے جیت چھین لی، تجربہ کار سابق کپتان سنیل گواسکر نے کہا کہ رانا کا آخری اوور شاندار رہا اور انہیں اس کیلئے اعزاز ملنا چاہئے تھا ۔ اسٹار اسپورٹس کے پروگرام ’کرکٹ لائیو‘میں گواسکر نے کہا کہ رانا کا آخری اوور شاندار تھا۔ انہوں نے جو پہلی گیندپھینکی، اس سے انہوں نے پوری طرح سبق حاصل کیا۔ یہ تیزگیندتھی اور کلاسن نے اسے چھکے کیلئے استعمال کیا تھا۔ اگلی پانچ گیندوں میں انہوں نے رفتار کو بڑھایا، سلو کٹر، دھیما آف کٹر بولنگ کی، جس کی وجہ سے کلاسن اور شہباز احمد کیلئے بڑے شاٹس کھیلنا مشکل ہوگیا، جو بالآخر ان کی وکٹیں گنوانے کا سبب بن گیا اور رانا کی اس شاندار گیندبازی نے میچ کا رخ الٹ گیا۔ ہرشت رانا کا یہ ایک شاندار اوور تھا ۔ میرے خیال میں منتظمین نے آندرے رسل کو ان کی دو وکٹیں اور 64 رنز کیلئے مین آف دی میچ کا اعزاز دیا، لیکن انھیں ہرشت رانا کو ان کے اسپل اور خاص طور پر آخری اوور کیلئے کچھ دینا چاہیے تھا۔ ہفتہ کو انڈین پریمیئر لیگ کے سنسنی خیز مقابلے میں کے کے آرنے سن رائزرس حیدرآباد کو بے حددلچسپ مقابلے میں صرف چار رنز سے شکست دی۔
