حصار کے ایم پی برجیندر سنگھ چودھری کانگریس میں شامل
چندی گڑھ :ہریانہ کی حصار لوک سبھا سیٹ سے رکن پارلیمنٹ برجیندر سنگھ چودھری نے بی جے پی سے استعفیٰ دے کر کانگریس پارٹی میں شمولیت اختیار کرلی ہے۔ وہ کانگریس کے قومی صدر ملکارجن کھرگے کی رہائش گاہ پر پہنچ کر کانگریس میں شامل ہوئے۔ اس موقع پر کانگریس کے کئی اہم لیڈران موجود تھے۔ ان کے بی جے پی چھوڑ کر کانگریس میں شامل ہونے کو بی جے پی کے لیے ایک بڑا جھٹکہ بتایا جا رہا ہے۔اس سے قبل بریجندر سنگھ چودھری نے سوشل میڈیا پلیٹ فارم ’ایکس‘ پر اپنے استعفیٰ کے بارے میں معلومات دی تھی۔ انہوں نے اپنے پوسٹ میں لکھا تھا کہ وہ سیاسی وجوہات کی وجہ سے بی جے پی کی بنیادی رکنیت سے استعفیٰ دے رہے ہیں۔ پارٹی قومی صدر جے پی نڈا، وزیر اعظم نریندر مودی، وزیر داخلہ امیت شاہ کا انہوں نے شکریہ ادا کیا کہ انہیں حصار سے ممبر پارلیمنٹ کے طور پر خدمت کرنے کا موقع دیا گیا۔ان کے کانگریس میں شامل ہونے کے بعد ایک پریس کانفرنس کا بھی انعقاد ہوا جس میں انہیں پارٹی میں خوش آمدید کہا گیا۔ واضح رہے کہ بی جے پی سے ان کے مستعفی ہونے کے بارے میں کئی دنوں سے باتیں ہو رہی تھی اور بالآخر انہوں نے اتوار 10 مارچ کو پارٹی سے مستعفی ہونے کا اعلان کر دیا۔ بریجندر سنگھ سابق مرکزی وزیر چودھری برین سنگھ کے بیٹے ہیں۔ 2019 میں انہوں نے جے جے پی کے دشینت چوٹالہ کو شکست دی تھی۔برجیندر سنگھ آئی اے ایس افسر رہ چکے ہیں۔ ان کے والد بریندر سنگھ 2022 تک راجیہ سبھا کے رکن رہے۔