چنڈی گڑھ : ریاست ہریانہ میں بڑھتے ہوئے کورونا معاملوں کے پیش نظر ہریانہ حکومت محتاط ہوگئی ہے اور اس نے اس وبا کو روکنے کے لئے متعدد اقدامات کئے ہیں اور لاک ڈاؤن نافذ نہ کرنے کا فیصلہ کیا ہے۔ ۔وزیر اعلی منوہر لال کھٹر نے اپنی زیر صدارت ریاست میں کورونا سے متعلق آج تمام ضلع ڈپٹی کمشنرز ، پولیس سپرنٹنڈنٹ اور سیول سرجنوں کے ساتھ منعقدہ جائزہ اجلاس میں کہا کہ ریاست میں آکسیجن اور وینٹیلیٹرز کی کمی نہیں ہے ۔ اس کے علاوہ بستر بھی کافی تعداد میں دستیاب ہیں۔ انہوں نے ریاست میں کورونا کی جانچ اور رابطے کی نشاندہی میں اضافہ کرنے اور اس وبا کو روکنے کے لئے تمام محکموں اور ریاست کے لوگوں کو ایڈوائزری جاری کرنے کی بھی ہدایت دی۔میٹنگ میں نائب وزیر اعلی دوشینت چوٹالہ اور وزیر صحت انیل وِج بھی موجود تھے۔ اس میٹنگ میں شادی کی تقریب کو رات کے بجائے دن میں کرنے ، اس طرح کی تقریبات میں آؤٹ ڈور میں 200 افراد کو اور انڈور میں پچاس لوگوں کی اجازت دی گئی ہے۔
