چیف منسٹر پشکر سنگھ دھامی کا اظہار افسوس‘ حادثہ کی تحقیقات کا حکم
رائے پور۔27؍جولائی( ایجنسیز)ہری دوار کے منسا دیوی مندر کے راستہ پر اتوار کو خوفناک بھگدڑ کا واقعہ پیش آیا۔ اس حادثہ میں کم سے کم 6 افراد کی موت ہو گئی جبکہ بڑی تعداد میں بھگت زخمی ہوئے ہیں۔ ابتدائی تحقیقات میں سامنے آیا ہے کہ سیڑھیوں پر بہت زیادہ بھیڑ تھی اور اچانک وہاں کچھ لوگوں کو کرنٹ لگنے کی افواہ پھیل گئی۔ کرنٹ کا ہنگامہ سن کر لوگ خود کو بچانے کیلئے اِدھر اُدھر بھاگنے لگے اور شدید بھگدڑ مچ گئی۔میڈیا کے مطابق حادثہ اس جگہ پر ہوا ہے جہاں مشہور منسا دیوی مندر کے لیے چڑھائی شروع ہوتی ہے۔ یہ علاقہ رام پرساد کی گلی کے طور پر مشہور ہے۔ ساون کا مہینہ ہونے کی وجہ سے ہری دوار میں ہر دن کروڑوں عقیدت مند پہنچ رہے ہیں اور بڑی تعداد میں لوگ نہانے کے بعد منسا دیوی کے درشن کیلئے جاتے ہیں۔ کچھ عقیدت مند روپ وے اور باقی سیڑھیوں کے سہارے مندر تک پہنچتے ہیں۔ہری دوار کے ایس ایس پی پرمیندر سنگھ ڈوبھال نے میڈیا سے بات چیت میں کہا کہ 9 بجے انہیں پولیس کنٹرول روم کے توسط سے اطلاع ملی تھی کہ منسا دیوی مندر راستے پر بھگدڑ میں کچھ لوگ زخمی ہوئے ہیں۔ فوری طور پر پولیس اہلکاروں نے لوگوں کے تعاون سے 35 زخمیوں کو ہاسپٹل پہنچایا۔ ان میں سے 6 کی موت کی تصدیق ہوئی ہے۔