عام عوام کے مقابلہ فوج میں ویکسین کے خلاف مزاحمت کی شرح زیادہ، سروے میں انکشاف
واشنگٹن : امریکی فوج کے ہزاروں اہلکاروں نے کورونا ویکسین لگوانے سے انکار کر دیا ہے۔ البتہ افسران مسلسل اْنہیں ویکسین سے متعلق انٹرنیٹ پر موجود افواہوں پر دھیان نہ دینے کی ہدایت دے رہے ہیں۔امریکی ایئر فورس کے میجر جنرل جیف ٹیلیفیرو نے چہارشنبہ کو کانگریس کو بریفنگ کے دوران بتایا کہ ابتدائی اعداد و شمار کے مطابق فوج کے دو تہائی اہلکاروں نے ویکسین لینے پر رضا مندی ظاہر کی تھی جب کہ بعض اہلکاروں نے ویکسین لگوانے سے انکار کیا ہے۔امریکہ فوج کی ‘آرمی فورسز کمانڈ’ کے سرجن بریگیڈیئر جنرل ایڈورڈ بیلی کا کہنا ہے کہ “ہم ویکسین سے متعلق اہلکاروں کو آگاہی دینے اور اْنہیں ویکسین لگوانے پر قائل کرنے کی کوشش کر رہے ہیں۔”اْن کے بقول فوج کی بعض یونٹس میں 30 فی صد اہلکاروں نے ویکسین لگوانے پر رضا مندی ظاہر کی ہے جب کہ دیگر یونٹس میں یہ تعداد کہیں 50 فی صد اور کہیں 70 فی صد ہے۔یاد رہے کہ آرمی فورسز کمانڈ امریکہ میں موجود 15 فوجی اڈوں کی نگران ہے جہاں لگ بھگ سات لاکھ 50 ہزار فوجی، ریزرو اہلکار اور نیشنل گارڈز موجود ہوتے ہیں۔جنرل ایڈورڈ بیلی کے مطابق ریاست نارتھ کیرولائنا کے قصبے فورٹ بریگ میں، جہاں موجود ہزاروں اہلکار مستقبل میں تعیناتی کی تیاری کر رہے ہیں، ویکسین لگوانے پر رضا مندی ظاہر کرنے والے اہلکاروں کی شرح صرف 60 فی صد ہے۔انہوں نے کہا کہ ویکسین لگوانے پر رضامندی ظاہر کرنے والوں کی یہ تعداد اتنی نہیں ہے جس کی ہم توقع کر رہے تھے۔غیر سرکاری تنظیم ‘کیسر فیملی فاؤنڈیشن’ کے ایک حالیہ سروے کے مطابق عام عوام کے مقابلے میں فوج میں ویکسین کے خلاف مزاحمت کی شرح زیادہ دیکھی گئی ہے۔عسکری اہلکاروں کی جانب سے ویکسین لگوانے کے خلاف مزاحمت ایسے موقع پر سامنے آئی ہے جب اہلکاروں کی بڑی تعداد ویکسین سینٹرز کے باہر فرائض انجام دے رہی ہے اور انہیں ویکسین کی ترسیل کی ذمہ داری سونپی گئی ہے۔چند ہفتے قبل امریکی محکمہی دفاع نے مؤقف اختیار کیا تھا کہ اْن کے پاس یہ اعداد و شمار نہیں کہ کتنے اہلکاروں نے ویکسین لگوانے سے انکار کیا ہے۔ تاہم اس حوالے سے حکام کا اب کہنا ہے کہ ابتدائی طور پر 9 لاکھ 16 ہزار 500 اہلکاروں کو ویکسین لگانے کا انتظام کیا گیا ہے۔ترجمان پینٹاگون جان کربی نے چہارشنبہ کو صحافیوں سے بات کرتے ہوئے کہا کہ فوج میں کورونا ویکسین کو قبول کرنے کی شرح عام عوام کے برابر ہے۔اْن کے بقول فوج بھی امریکی عوام کا ہی حصہ ہے اس لیے فوج میں بھی ویکسین نہ لگوانے کا رجحان موجود ہے۔