نئی دہلی: وزیر اعظم نریندر مودی نے جمعہ کو امریکی صدر جو بائیڈن کے ساتھ دو طرفہ بات چیت کی جس میں دونوں ممالک کے درمیان تعلقات کو مزید گہرا کرنے پر توجہ مرکوز کرنے والے مختلف امور پر تبادلہ خیال کیا گیا۔ یہ ملاقات وزیر اعظم مودی کی زیر صدارت جی 20 سربراہی اجلاس میں شرکت کے لیے بائیڈن کے نئی دہلی پہنچنے کے فوراً بعد ہوئی۔ وزیر اعظم کے دفتر (پی ایم او) نے کہا، “دونوں لیڈران کے درمیان بات چیت میں بہت سے مسائل شامل رہے اور اس سے ہندوستان اور امریکہ کے تعلقات مزید گہرے ہوں گے پی ایم مودی نے بھی بائیڈن کے ساتھ ملاقات کو خوشی کا لمحہ قرار دیا۔ انہوں نے ‘X’ پر پوسٹ کیا، “امریکی صدر جو بائیڈن کو 7، لوک کلیان مارگ پر خوش آمدید کہتے ہوئے خوشی ہوئی۔ ہماری ملاقات بہت معنی خیز رہی۔ ہم کئی ایسے موضوعات پر بات چیت کرنے میں کامیاب رہے جو ہندوستان اور امریکہ کے درمیان اقتصادی اور عوام کے درمیان تعلقات کو آگے بڑھائیں گے۔ “ہمارے ممالک کے درمیان دوستی عالمی بہبود کو آگے بڑھانے میں ایک عظیم کردار ادا کرتی رہے گی۔
