ایڈیلیڈ ۔30 نومبر (سیاست ڈاٹ کام ) آسٹریلین سابق آل راؤنڈر ڈین جونز نے پاکستانی کھلاڑیوں کی کمزور انگریزی زبان کا مذاق اڑانے والے آسٹریلیائی صحافی کو سخت جواب دے دیا۔ اکثر پاکستانی کھلاڑیوں کو انگریزی بولنے میں مشکلات پیش آتی ہیں اور یہ سب پر عیاں ہے جس کی وجہ سے کئی مواقع پر وہ مترجم کی بھی خدمات حاصل کرتے ہیں۔ تازہ واقعہ دوسرے ٹسٹ کے دوران اس وقت پیش آیا ٹی وی میزبان نے پاکستانی کرکٹر سے کچھ بات کرنے کی کوشش کی اور انہیں انگریزی زبان میں جواب دینے میں دقت کا سامنا کرنا پڑا۔ یہ سب دیکھنے کے بعد ایک آسٹریلیائی صحافی نے پاکستانی کرکٹر کی زبان اور تلفظ کا مذاق اڑاتے ہوئے کہا کہ فاکس اسپورٹس پر ابھی ایک پاکستانی فاسٹ بولرکا انٹرویو سنا اور مجھے اس کا ایک بھی لفظ سمجھ نہیں آیا۔ ٹونی ٹارڈیو نامی اس صحافی نے پاکستانی کرکٹر کا مذاق اڑانے کی کوشش کی لیکن اس حرکت وہ الٹا خود مذاق بن گئے۔ ڈین جونز کو ان کی یہ ٹوئٹ ہرگز پسند نہ آئی اور انہوں نے آسٹریلیائی صحافی کو آئینہ دکھا دیا۔ ڈین جونز نے ٹونی کی ٹوئٹ کا جواب دیتے ہوئے کہا کہ ٹونی کم از کم وہ کوشش تو کرتے ہیں، انگریزی ان کی مادری زبان نہیں بلکہ دوسری زبان ہے اور جب ہمارے کرکٹرزکا متحدہ عرب امارات میں انٹرویو لیا جاتا ہے تو وہ اردو میں جواب نہیں دیتے۔ ڈین جونز کے اس جواب کو ٹوئٹر صارفین نے بہت پسند کیا اور پاکستان کے ساتھ ساتھ ہندوستانی صارفین نے بھی اس جواب پر ان کی کھل کر تعریف کرتے ہوئے ان سے صد فیصد اتفاق کیا۔
