بھوپال: وزیر اعظم نریندر مودی نے اگلے سال ہونے والے لوک سبھا اور مدھیہ پردیش سمیت پانچ ریاستوں میں اسمبلی انتخابات سے قبل آج بھارتیہ جنتا پارٹی کے لاکھوں بوتھ کارکنوں کو جیت کا منتر دیتے ہوئے کہا کہ بی جے پی ان پارٹیوں میں سے نہیں ہے جو ائیرکنڈیشنڈ کمروں میں بیٹھ کر اپنی پارٹی چلاتے ہیں اور بی جے پی کے ہر بوتھ کی پہچان صرف خدمت سے ہی ہونی چاہیے۔ مودی نے یہاں بی جے پی کی ‘میرا بوتھ سب سے مضبوط’ مہم کے تحت ملک بھر سے آئے تقریباً 3000 بوتھ کارکنوں سے خطاب کیا۔ اس دوران ملک بھر سے لاکھوں بوتھ ورکرس بھی ورچوئلی اس پروگرام سے جڑے ۔ پارٹی کے صدر جے پی نڈا، مدھیہ پردیش کے وزیر اعلی شیوراج سنگھ چوہان اور پارٹی کے مدھیہ پردیش یونٹ کے صدر وشنو دت شرما بھی اس تقریب میں موجود تھے ۔ اس پروگرام میں ملک بھر سے منتخب بوتھ کارکنوں نے وزیر اعظم مودی سے اپنے سوالات پوچھے ۔ ان سوالوں کا جواب دیتے ہوئے مودی نے بہت سے چھوٹے چھوٹے خدمت کے کاموں کی مثالیں دیں اور بوتھ ورکرس کو ہدایت کی کہ وہ ان کاموں کو کرکے اپنے بوتھ کو مضبوط کریں۔ اس دوران انہوں نے کہا کہ سال 2047 میں جب ملک کی آزادی کے 100 سال مکمل ہوں گے ، ہندوستان اس وقت ترقی یافتہ ہوگا جب گاوں ترقی یافتہ ہوں گے ۔ اسی سلسلے میں انہوں نے بوتھ ورکرس کی طرف سے آنگن واڑیوں کے بچوں میں غذائیت کی کمی کو دور کرنے اور اسکول چھوڑنے کی شرح کو کم کرنے کی کوششوں کا بھی ذکر کیا۔ انہوں نے کہا کہ ہمیں غریبوں کو مشکلات سے نجات دلانی ہے ۔ کارکن سوشل میڈیا پر اپنے بوتھ کا ایک گروپ بنا سکتے ہیں۔ انہوں نے کہا کہ عام آدمی تقابلی مطالعہ سے معاملے کو زیادہ آسانی سے سمجھ سکتا ہے ۔ مطالعہ کریں اور پرانے وقتوں کا موازنہ کرکے بتائیں۔
پٹنہ اور رانچی کے درمیان وندے بھارت ٹرین کا آپریشن شروع
رانچی: مسافروں کی سہولت کو مدنظر رکھتے ہوئے ، پٹنہ اور رانچی کے درمیان جدید ترین اور عالمی معیار کی سہولیات کے ساتھ تیز رفتار وندے بھارت ٹرین کا آپریشن آج سے شروع ہو گیا ہے ۔ رانچی سے پٹنہ تک وندے بھارت ٹرین آپریشن کا آج خصوصی ٹرین 02439 کے طور پر افتتاح کیا گیا۔ وزیر اعظم نریندر مودی نے آج بھوپال سے اس ٹرین کا آن لائن افتتاح کیا۔ اس کے بعد 28 جون سے ٹرین نمبر 22349/22350 پٹنہ-رانچی-پٹنہ وندے بھارت ٹرین باقاعدگی سے چلائی جائے گی۔
یہ ٹرین منگل کے علاوہ پٹنہ اور رانچی سے ہفتے میں چھ دن چلے گی۔
