ممبئی ، 16 جولائی (یو این آئی) نیشنلسٹ کانگریس پارٹی کے قومی صدر اور ریاست کے نائب وزیر اعلیٰ اجیت پوار نے کہا ہے کہ ان کی حکومت کی بنیادی ترجیح ترقی ہے اور وہ سبھی طبقات کو ساتھ لے کر چلنے کے لیے پرعزم ہے ۔ انہوں نے کہا کہ ان کی حکومت کا مقصد معاشرے کی بہتری ہے اور بلدیاتی انتخابات میں کامیابی کے لیے سنجیدگی سے کام کیا جا رہا ہے ۔اجیت پوار نے ناسک ضلع کی شاندار کارکردگی کا اعتراف کرتے ہوئے کہا کہ انہوں نے قانون ساز اسمبلی میں 100 فیصد سیٹیں حاصل کی ہیں اور وہ اس حقیقت سے انکار نہیں کرتے ۔ انہوں نے مزید کہا کہ ان کی پارٹی نے اقتدار میں پسماندہ، قبائلی، او بی سی اور بہوجن طبقات کو بھرپور نمائندگی دی ہے ۔ انہوں نے واضح کیا کہ ان کی سیاسی سوچ شیو، شاہو، پھولے اور امبیڈکر کے نظریات پر مبنی ہے ، اور انہی اصولوں کی بنیاد پر تمام طبقات کو آگے لایا جا رہا ہے ۔اس موقع پر اجیت پوار نے کانگریس کے نوجوان رہنما ویبھو ٹھاکر اور ان کے ساتھی کارکنوں کا نیشنلسٹ کانگریس پارٹی میں خیرمقدم کیا۔ آج ناسک ضلع سے تعلق رکھنے والے ویبھو ٹھاکر نے اپنے کئی کارکنوں کے ساتھ کے سی کالج ہال میں منعقدہ تقریب میں این سی پی میں باضابطہ شمولیت اختیار کی۔اس تقریب میں نائب وزیر اعلیٰ اجیت پوار، قانون ساز اسمبلی کے ڈپٹی اسپیکر انا بنسوڈے ، خزانچی ایم ایل اے شیواجی راؤ گرجے ، ایم ایل اے ہیرامن کھوسکر، ایم ایل اے وجے سنگھ پنڈت، یوتھ ریاستی صدر سورج چوہان، ریاستی نائب صدر پرمود ہندوراؤ، جنرل سکریٹری لطیف تمبولی، بورجا ضلع جنوبی کے صدر مہیندرا اور سانبھو کے ضلعی صدر سمیت بڑی تعداد میں پارٹی کارکنان و عہدیداران موجود تھے ۔
