آپریشن سندور پر فضائیہ کے سربراہ کا پہلی بار سرکاری طور پر انکشاف
نئی دہلی ۔9 ؍اگست (ایجنسیز)جموں و کشمیر کے پہلگام میں دہشت گردانہ حملہ کے بعد ہندوستان اور پاکستان کے درمیان تعلقات انتہائی کشیدہ ہو گئے تھے۔ اس حملہ کے بعد دہشت گردوں کے خلاف کارروائی کرتے ہوئے ہندوستانی فوج نے ’آپریشن سندور‘ کو انجام دیا تھا۔ اس کے تحت پاکستان مقبوضہ کشمیر اور پاکستان کے کچھ دیگر علاقوں میں دہشت گردانہ اڈوں کو کامیابی کے ساتھ نشانہ بنایا گیا تھا۔ اس حملے میں 100 سے زائد دہشت گردوں کی ہلاکت کا دعویٰ بھی کیا گیا تھا۔ اب ہندوستانی فضائیہ کے چیف امرپریت سنگھ نے پہلی مرتبہ سرکاری طور پرایک بڑا بیان دیا ہے جو آپریشن سندور کی کامیابی کی طرف واضح اشارہ کر رہا ہے۔ایئرچیف مارشل امرپریت سنگھ کا کہنا ہے کہ آپریشن سندورکے دوران ہندوستانی فضائیہ نے پاکستان کے6 جنگی طیاروں کو مار گرایا تھا۔ انھوں نے یہ بھی بتایا کہ اس آپریشن کے ذریعہ پاکستان کو واضح اور سخت پیغام دیا تھا۔ مار گرائے گئے طیاروں میں پاکستان کے 6 جنگی طیارے اور ایک جاسوسی طیارہ اے ڈبلیو اے سی ایس تھا۔بنگلورو میں ایک تقریب سے خطاب کرتے ہوئے فضائیہ چیف ایئر مارشل اے پی سنگھ نے تصدیق کی کہ ہندوستان نے آپریشن سندور کے دوران پاکستانی فضائیہ کے 6 جنگی طیاروں اور 1 اے ای ڈبلیو اینڈ سی ایس طیارہ کو تباہ کر دیا تھا۔ پاکستان کو ہوئے نقصان کی تعداد کے بارے میں فضائیہ کے اعلیٰ عہدہ سے اس طرح کی تصدیق پہلی بار کی گئی ہے۔ حالانکہ پاکستان کی طرف سے اس بارے میں ابھی تک کوئی رد عمل سامنے نہیں آیا ہے۔بنگلورو کی تقریب میں آپریشن سندور کا ذکر کرتے ہوئے ایئر چیف مارشل نے (بہاولپور۔جیش محمد ہیڈکوارٹر میں) پہنچائے گئے نقصان کی پہلے اور بعد کی تصویریں بھی پریس کانفرنس میں انہوں نے دکھائیں۔ یہاں تقریباً کوئی سامان نہیں بچا ہے۔ آس پاس کی عمارتیں تقریباً پوری طرح محفوظ ہیں۔انہوں نے مزید کہا کہ کامیابی کی ایک اہم وجہ سیاسی عزائم کا ہونا تھا۔ ہمیں بہت واضح ہدایت دی گئی تھی۔ ہم پر کوئی پابندی نہیں لگائی گئی تھی۔ اگر کوئی پابندی تھی تو وہ خود سے پیدا کی ہوئی تھی۔ ہم نے طے کیا کہ کتنا آگے بڑھنا ہے۔ ہمیں منصوبہ بنانے اور اسے عملی جامہ پہنانے کی پوری آزادی تھی۔ ہمارے حملے سوچ سمجھ کر کیے گئے تھے کیونکہ ہم اس معاملے میں پختہ ہونا چاہتے تھے۔پریس کانفرنس میں انہوں نے یہ بھی بتا یا کہ حملہ کے وقت ان کے قریب جو تھے انہوں نے کہا کہ ابھی اور مارنا تھا۔ ان کی اس بات پر ہال تالیوں سے گونج اٹھا۔