نئی دہلی، 5 اگست (یو این آئی) لوک سبھا میں حزب اختلاف کے قائد راہول گاندھی نے کہا ہے کہ منگل کے روز پارلیمنٹ ہاؤس کے احاطے میں انڈیا الائنس کے لیڈران کی میٹنگ ہوئی، جس میں عوامی مسائل کو ایک ساتھ اٹھانے پر تبادلۂ خیال کیا گیا۔ میٹنگ میں راہول گاندھی پر ایک جج کے تبصرے پر بھی بات کی گئی، میٹنگ میں سرحدوں کی حفاظت کا معاملہ بھی اٹھایا گیا اور کہا گیا کہ حکومت ملکی سرحدوں کو محفوظ رکھنے میں ناکام ہو چکی ہے۔ سوشل میڈیاپلیٹ فارم فیس بک پوسٹ میں راہول گاندھی نے کہا کہ آج میں نے پارلیمنٹ میں کانگریس کے صدر اور راجیہ سبھا میں اپوزیشن لیڈر ملکارجن کھرگے جی کی موجودگی میں انڈیا الائنس کے فلور لیڈروں کی میٹنگ میں شرکت کی، ہم ساتھ مل کر عوام کے حقوق اور جمہوریت کے تحفظ کے لیے ایوان میں اپنی آواز بلند کرتے رہیں گے۔ اس دوران کانگریس پارٹی نے میٹنگ میں اٹھائے گئے مسائل کے بارے میں جانکاری دیتے ہوئے کہا کہ آج صبح پارلیمنٹ میں ایوان کے قائدین کی میٹنگ میں سپریم کورٹ کے ایک موجودہ جج کی جانب سے راہول گاندھی پر کئے گئے تبصرہ پر تبادلہ خیال کیا گیا۔
