وزرائے اعظم مودی اور اسٹارمر کا آزاد تجارتی معاہدے پر خوشی کا اظہار
نئی دہلی: وزیر اعظم نریندر مودی اور برطانیہ کے وزیر اعظم کیر اسٹارمر نے ہندوستان اور برطانیہ کے درمیان باہمی طور پر فائدہ مند آزاد تجارت معاہدے (ایف ٹی اے ) کے مکمل ہونے پر آج خوشی کا اظہار کیا اور دو طرفہ اسٹریٹجک شراکت داری کو نئی بلندیوں تک لے جانے کی خواہش ظاہر کی۔مودی اور مسٹراسٹارمر نے آج ٹیلی فون پر بات چیت کی۔دونوں رہنماؤں نے دوہرے تعاون کے کنونشن کے ساتھ ساتھ ایک جرأت مندانہ اور ہندوستان-برطانیہ دونوں کے لئے فائدہ مند آزاد تجارتی معاہدہ ہونے کا خیر مقدم کیا۔ان رہنماؤں نے اسے دو طرفہ جامع اسٹریٹجک شراکت داری میں ایک تاریخی سنگ میل قرار دیا جس سے دونوں معیشتوں میں تجارت، سرمایہ کاری، اختراع اور روزگار کے مواقع کو فروغ ملے گا۔دونوں نے اس بات پر اتفاق کیا کہ دنیا کے دو کھلے بازاروں کی عظیم معیشتوں کے درمیان تاریخی معاہدوں سے کمپنیوں کیلئے نئے مواقع فراہم ہوں گے ، اقتصادی تعلقات مضبوط ہوں گے اور لوگوں کے درمیان تعلقات مزید گہرے ہوں گے ۔وزیر اعظم اسٹارمر نے کہا کہ اتحاد کو مضبوط بنانا اور دنیا بھر کی معیشتوں کے ساتھ تجارتی رکاوٹوں کو کم کرنا ان کے مضبوط اور محفوظ معیشت میں تبدیلی کے منصوبے کا حصہ ہے ۔دونوں رہنماؤں نے اس بات پر اتفاق کیا کہ ہندوستان اور برطانیہ کے درمیان اقتصادی اور تجارتی تعلقات کی توسیع مزیدشراکت داری کی مضبوط اور کثیر جہتی بنیاد بنی رہے گی۔ایک متوازن، مساوی اورجرأت مندانہ ایف ٹی اے ہونے سے ، جس میں اشیا اور خدمات کی تجارت کا احاطہ کیا گیا ہے ، توقع کی جاتی ہے کہ اس سے دو طرفہ تجارت میں نمایاں بہتری آئے گی، روزگار کے نئے مواقع پیدا ہوں گے ، معیاری زندگی میں اضافہ ہوگا اور دونوں ممالک کے شہریوں کی عمومی فلاح و بہبود میں بہتری آئے گی۔اس سے دونوں ممالک کیلئے امکانات کو بروئے کارلانے کا بھی موقع ملے گا تاکہ عالمی منڈیوں کیلئے مصنوعات اور خدمات کی تیاری مشترکہ طور پر کی جائے ۔یہ معاہدہ ہندوستان-یوکے جامع اسٹریٹجک شراکت داری کی مضبوط بنیادوں کو مستحکم کرتا ہے اور تعاون اور خوشحالی کے ایک نئے دور کی راہ ہموار کرتا ہے ۔وزیر اعظم مودی نے وزیر اعظم اسٹارمر کو ہندوستان آنے کی دعوت دی ۔دونوں رہنماؤں کے درمیان رابطہ برقراررکھے جانے پر اتفاق ہوا ۔