دبئی ،22ستمبر(یو این آئی )ایشیا کپ سوپر4 مرحلہ میں ہندوستان سے شکست کے بعد پاکستان کے کپتان سلمان علی آغا کا بیان سامنے آگیا۔ کپتان سلمان نے پریس کانفرنس میں کہا کہ ٹیم نے پرفیکٹ گیم نہیں کھیلا، ہندوستانی بیاٹرز نے پاور پلے میں شانداربیٹنگ کرکے میچ ہم سے چھین لیا۔ ان کا کہنا تھا ہم نے بولنگ توقع کے مطابق نہیں کی، اننگز میں 10-15رنز کم ہوئے ہیں، ہمارا اسکور 180رنز سے زائد ہونا چاہیے تھا۔ سلمان نے کہا کہ سری لنکا کے خلاف میچ میں خامیوں کو دور کرنے کی کوشش کریں گے۔ ہندوستان نے ایشیا کپ کے سوپر 4 مرحلے میں پاکستان کی ناقص کپتانی اور فیلڈنگ کا فائدہ اٹھایا اور 172رنز کا ہدف 4 وکٹ کے نقصان پر باآسانی حاصل کر کے اہم فتح اپنے نام کی۔ سلمان نے میچ میں فخر زمان کے کیچ آؤٹ کو ممکنہ طور پر غلط قرار دیتے ہوئے کہا کہ ہمیں لگا گیند زمین پر لگی مگر فیصلہ امپائر کا ہی ہوتا ہے ۔
