سووا، 2 فروری (آئی اے این ایس) فجی میں ہندوستان کے ہائی کمشنر سْنیت مہتا نے پیرکے روز فجی پارلیمنٹ کے اسپیکر فِلی مونے جیتوکو سے ملاقات کی، جس میں دوطرفہ تعاون کو مزید مضبوط بنانے پر تبادلہ خیال کیا گیا۔ ملاقات کے بعد فجی میں ہندوستانی ہائی کمیشن نے ایکس (سابق ٹوئٹر) پر ایک پوسٹ میں کہا، “ہائی کمشنر سْنیت مہتا کو فجی پارلیمنٹ کے معزز اسپیکر جناب فِلی مونے جیتوکو سے ملاقات کا اعزاز حاصل ہوا۔ اس موقع پر نتیجہ خیز گفتگو ہوئی، جس میں مضبوط پارلیمانی روابط کی توثیق اور دوطرفہ تعاون کو آگے بڑھانے کے امکانات پر غور کیا گیا۔ 27 جنوری کو سْنیت مہتا نے پراجیکٹ اسٹیئرنگ کمیٹی کی دوسری میٹنگ کی صدارت کی، جس میں ہندوستان کے تعاون سے جاری کوئیک امپیکٹ پروجیکٹ (کیو آئی پی) توبالیوو گراؤنڈ واٹر سپلائی پروجیکٹ کا جائزہ لیا گیا۔ اجلاس میں فجی حکومت، فجی وزارتِ خارجہ و خارجہ تجارت، فجی وزارتِ خزانہ اور وزارتِ تعمیراتِ عامہ کے نمائندوں نے شرکت کی۔ زمینی سطح پر کام کا آغاز ہو چکا ہے، جس سے توبالیوو کے رہائشیوں کو پانی کی فراہمی ممکن ہوگی اور ہندوستان و فجی کے تعلقات مزید مضبوط ہوں گے۔ 19 جنوری کو سْنیت مہتا نے فجی کے وزیرِ خزانہ، تجارت اور کاروباری ترقی ایسروم ایمانوئل سے ملاقات کی اور باہمی دلچسپی کے شعبوں میں تعاون بڑھانے اور دوطرفہ تعلقات کو مستحکم کرنے پر گفتگو کی تھی۔ ہائی کمیشن کے مطابق، ہائی کمشنر سْنیت مہتا نے آج وزیرِ خزانہ، تجارت اور کاروباری ترقی معزز ایس روم ایمانوئل سے خیرسگالی ملاقات کی۔ اس موقع پر نتیجہ خیز گفتگو ہوئی، جس میں دوطرفہ تعلقات کو مضبوط بنانے اور باہمی دلچسپی کے شعبوں میں تعاون بڑھانے پر توجہ دی گئی۔ ہندوستان اور فجی کے تعلقات باہمی احترام، تعاون اور مضبوط ثقافتی و عوامی روابط پر مبنی ہیں۔ نومبر 2014 میں وزیرِاعظم نریندر مودی کے فجی کے دورے کے بعد دوطرفہ تعلقات کو نمایاں تقویت ملی، جس کے دوران فورم فار انڈیا ۔ پیسفک آئی لینڈزکوآپریشن کا پہلا اجلاس بھی منعقد ہوا۔ ہندوستانی ہائی کمیشن کے مطابق، گزشتہ برسوں کے دوران ہندوستان نے فجی کی قومی تعمیر کے عمل میں مختلف اہم شعبوں اور صلاحیت سازی کے میدان میں بھرپور تعاون کیا ہے۔
