ممبئی 3 نومبر (یو این آئی)ہندوستانی خواتین ٹیم کی شاندار جیت کے بعد اب انعامات کی بارش ہو رہی ہے۔ ہندوستانی کرکٹ کنٹرول بورڈ (بی سی سی آئی) نے کھلاڑیوں اور ٹیم کے معاون عملے کے لیے بڑا اعلان کیا ہے۔ بی سی سی آئی ہندوستانی ٹیم کو بطورانعام 51 کروڑ روپے دے گا۔ بی سی سی آئی کے سکریٹری دیوجیت سیکیا نے اس کی تصدیق کی ہے۔ یہ پہلا موقع ہے جب ہندوستانی خواتین ٹیم کو اتنی بڑی انعامی رقم ملے گی۔ہندوستانی خواتین کرکٹ ٹیم نے جنوبی افریقہ کو شکست دے کر 52 سال میں پہلی بار ویمنز ورلڈ کپ 2025 کی ٹرافی جیت لی۔ یہ مقابلہ جیتنے کے بعد ٹیم انڈیا کو بھاری رقم ملی ہے۔ جنوبی افریقہ بھی ہار کر امیر ہو گیا۔ ہندوستانی کرکٹ ٹیم کو ویمینز ون ڈے ورلڈ کپ 2025 کا فائنل جیتنے پر 4.48 ملین امریکی ڈالر کی انعامی رقم سے نوازا گیا۔ یہ 2022 کے ایڈیشن سے 239 فیصد زیادہ ہے۔ یہ اس 4 ملین امریکی ڈالر سے زیادہ ہے جو مینز کرکٹ ورلڈ کپ 2023 کے فاتحین کو دیے گئے تھے۔مزید برآں، ہندوستانی ٹیم کو پہلے ہی 350,000 امریکی ڈالر (تقریباً 3.1 کروڑ روپے) بطور شرکت انعام اور گروپ مرحلے میں تین جیت کے لیے مل چکے ہیں۔ ہندوستان کی کل انعامی رقم 42 کروڑ روپے سے تجاوز کر گئی ہے۔ بی سی سی آئی نے ٹیم انڈیا کو 51 کروڑ روپے بھی دیئے ہیں۔جنوبی افریقہ کی خواتین کرکٹ ٹیم کو فائنل میں رنر اپ کی حیثیت سے کامیابی حاصل کرنے پر 2.24 ملین روپے انعامی رقم دی گئی۔ یہ ہندوستانی ٹیم کو ملی رقم کا نصف ہے۔ جنوبی افریقہ کو 400,000 امریکی ڈالر سے زیادہ کا انعام دیا گیا کیونکہ اس نے لیگ مرحلے میں ہندوستان سے دو زیادہ میچ جیتے تھے۔ی اے این آئی سے بات کرتے ہوئے دیوجیت سیکیا نے کہا کہ کپل دیو نے 1983 میں ہندوستان کو ورلڈ کپ جیتا کرہندوستانی کرکٹ کو نئی توانائی اور تحریک دی تھی۔ اب ہرمن پریت کور اور ان کی ٹیم نے وہی جوش اور ولولہ دوبارہ پیدا کیا ہے۔ انہوں نے نہ صرف ٹرافی جیتی ہے بلکہ پوری قوم کا دل جیت لیا ہے۔دیوجیت سیکیا نے کہا کہ یہ جیت ہندوستان میں خواتین کی کرکٹ کے مستقبل کو ایک نئی سمت دے گی اور کھلاڑیوں کی اگلی نسل کو متاثر کرے گی۔ تنخواہوں میں مساوات پر بھی توجہ دی گئی ہے۔ حال ہی میں خواتین کے ورلڈ کپ کے لیے انعامی رقم میں 300 فیصد کا اضافہ کیا گیا۔ یہ2.88 ملین ڈالر سے بڑھ کر تقریباً 14 ملین ڈالر کر دی گئی ہے۔ ان اقدامات سے خواتین کی کرکٹ کو نمایاں فروغ ملا ہے۔ بی سی سی آئی نے کھلاڑیوں، کوچز اور معاون عملے کے لیے 51 کروڑ روپے کی انعامی رقم کا بھی اعلان کیا ہے۔
