نئی دہلی۔29 جنوری (سیاست ڈاٹ کام) بی سی سی آئی نے واضح کردیا ہے کہ انہیں پاکستان کرکٹ بورڈ (پی سی بی) کی جانب سے ایشیا کپ 2020 کے ایڈیشن کی میزبانی پر کوئی اعتراض نہیں تاہم اس وقت ان کے لیے پڑوسی ملک ٹیم روانہ کرنا نہیں ہے ۔ رپورٹ کے مطابق آئی اے این ایس نیوز ایجنسی سے بات کرتے ہوئے بی سی سی آئی حکام نے کہا ہے کہ مسئلہ میزبانی کے حقوق نہیں بلکہ مسئلہ صرف کھیلنے کے مقام کا ہے کیونکہ ہندوستانی ٹیم ٹی 20 ٹورنمنٹ کے لیے پاکستان نہیں جائے گی۔انہوں نے مزید کہا ہے کہ سوال پی سی بی کے ٹورنمنٹ کی میزبانی کرنے پر نہیں بلکہ جو چیزیں ہمارے سامنے ہیں، ہمیں مسئلہ اس کے مقام پر ہے یہ بہت واضح ہے کہ ہمیں ایک دوسرا مقام چاہیے۔ ہندوستانی ٹیم کسی صورت پاکستان کا دورہ کرکے ایشیاکپ جیسے مختلف ممالک پر مشتمل ٹورنمنٹ میں شرکت نہیں کرے گی۔ انہوں نے کہا کہ اگر ایشین کرکٹ کونسل (اے سی سی) ہندوستان کو ہٹا کر ایشیا کپ کروانے پر راضی ہے تو یہ الگ بات ہے تاہم ہندوستان کی ایشیا کپ میں شرکت کے لیے اس کا مقام پاکستان نہیں ہوسکتا۔ حکام نے کہا ہے کہ ایشیا کپ کے 2018 کے ایڈیشن میں پاکستانی کھلاڑیوں کے لئے ہندوستان آکر کھیلنے کے لیے ویزا کے اجرا میں مسائل ہی کی وجہ سے بی سی سی آئی نے ٹورنمنٹ متحدہ عرب امارات میں منعقد کیا تھا۔ انہوں نے مزید کہا کہ پی سی بی بھی اس طرح کا کوئی اقدام کرسکتا ہے اور ٹورنمنٹ کی میزبانی کسی اور مقام پر کرسکتا ہے، مختلف مقام ہمیشہ سے زیر غوررہے ہیں جیسا بی سی سی آئی نے 2018 میں کیا تھا۔واضح رہے کہ پاکستان میں کرکٹ کی ایک دہے بعد 2019 میں سری لنکا کے دورہ پاکستان کے ساتھ واپسی ہوئی ہے جہاں سری لنکا پہلا ملک تھا جس نے پاکستان میں پوری سیریز کھیلی وہیں بنگلہ دیش بھی 3 مرحلوں میں پاکستان کا دورہ کر رہا ہے۔ بنگلہ دیش نے 3 ٹی 20 انٹرنیشنل میچز کی سیریز لاہور میں ختم کی ہے جبکہ اب وہ 7 فروری سے 11 فروری تک راولپنڈی میں ٹسٹ میچزکھیلیں گے اور بعد ازاں کراچی میں ایک ونڈے کھیلنے کے بعد 5 اپریل سے 9 اپریل تک دوسرا ٹسٹ میچ بھی کھیلیں گے۔یاد رہے پاکستان نے حالیہ دنوں میں سری لنکا اور بنگلہ دیش کی کامیاب میزبانی کی ہے جس سے یہاں بین الاقوامی کرکٹ بحال ہورہی ہے ۔