رانچی۔17 اکٹوبر (سیاست ڈاٹ کام ) ہندوستان اور جنوبی افریقہ کے درمیان تیسرے اور آخری ٹسٹ میچ کے لئے ہندوستانی ٹیم کے پانچ اور جنوبی افریقہ کی پوری ٹیم رانچی پہنچ چکی ہے۔ ہندوستان اور جنوبی افریقہ کا 19 اکتوبر سے رانچی کے جے ایس سی اے بین الاقوامی اسٹیڈیم میں سیریز کا تیسرا اور آخری مقابلہ کھیلا جائے گا۔ تیسرا مقابلہ سابق ہندوستانی کپتان مہندر سنگھ دھونی کے گھریلو میدان میں کھیلا جائے گا اور ٹیم کا مقصد دھونی کے گھر میں کلین سویپ کرنا ہوگا۔ ہندوستانی ٹیم کی جانب سے مینک اگروال، چتیشور پجارا، روی چندرن اشون، ایشانت شرما اور ہنوما وہاری رانچی پہنچے ہیں جبکہ کپتان ویراٹ کوہلی اور دیگر کھلاڑی رانچی پہنچیں گے۔ ہندوستانی ٹیم نے جنوبی افریقہ کو وشاکھاپٹنم اور پونے میں پہلے دو ٹسٹ میچوں میں شکست دے کر سیریز میں 2-0 کی ناقابل تسخیر برتری حاصل کرلی ہے اور تیسرے ٹسٹ میں اس کا ہدف 3-0 سے کلین سویپ کرنا ہوگا۔ جے ایس سی اے بین الاقوامی اسٹیڈیم میں یہ دوسرا ٹسٹ میچ ہوگا۔ اس میدان پر پہلا ٹسٹ ہندوستان اورآسٹریلیا کے درمیان مارچ 2017 میں کھیلا گیا اوردلچسپ بات یہ ہے کہ وہ بھی سیریز کا تیسرا ٹسٹ میچ تھا۔ آسٹریلیا نے پہلی اننگز میں 451 رنز بنائے تھے جبکہ ہندوستان نے چتیشور پجارا کے 202 اور ردھمان ساہا کے 117 رنز کی بدولت اپنی پہلی اننگز نو وکٹ پر 603 رن بنا کر ڈکلیئر کردی تھی۔ آسٹریلیا نے دوسری اننگز میں چھ وکٹ پر 204 رن بنا کر میچ ڈرا کرا لیا تھا۔ اس میدان پر جنوبی افریقہ کا یہ پہلا میچ ہوگا۔جنوبی افریقہ نے اس میدان پر کوئی ونڈے یا ٹی 20 میچ نہیں کھیلا ہے۔ جنوبی افریقہ کی ٹیم اس میدان پر ہر حال میں واپسی کی کوشش کرے گی۔
