اسلام آباد ۔8 جنوری (سیاست ڈاٹ کام)آسٹریلیا کے خلاف 71 برسوں میں ہندوستان کی ٹسٹ سیریز میں کامیابی پر پاکستان کے سابق کپتان اور موجودہ وزیر اعظم عمران خان نے مبارک باد دی۔ ہندوستان اور آسٹریلیا کے درمیان 4 میچوں پر مشتمل سیریز کا آخری ٹسٹ میچ سڈنی کرکٹ گراؤنڈ میں کھیلا گیا تھا جس میں پہلی اننگز میں ہندوستان نے پہاڑ جیسا اسکور کھڑا کرکے آسٹریلیا کو شکست کے منہ میں دھکیل دیا تھا۔ آسٹریلیا کی سیریز میں شکست اس وقت مزید عیاں ہوئی جب آسٹریلی ٹیم کو فالو آن کا سامنا کرنا پڑا، تاہم میچ کے آخری دن بارش کے باعث میچ نہیں کھیلا گیا اور ٹسٹ میچ ڈار کی صورت میں ختم ہوا۔ قبل ازیں ہندوستان نے ابتدائی3 میچوں میں آسٹریلیا پر 1-2 کی سبقت حاصل کی ہوئی تھی اور سڈنی ٹسٹ ڈار ہونے پر سیریز ہندوستان کے نام رہی۔ ہندوستان،آسٹریلیا کو اس ہی کی سرزمین پر ٹسٹ سیریز میں شکست دینے والی پہلی ایشیائی ٹیم بن گئی جس کے بعد ہندوستانی کپتان ویراٹ کوہلی اور ان کی ٹیم کو دنیائے کرکٹ سے مبارک باد کے پیغامات کا نہ تھمنے والا سلسلہ بھی شروع ہوا۔ اس ضمن میں پاکستان کرکٹ ٹیم کے چمپیئن کپتان عمران خان نے بھی سماجی رابطے کی ویب سائٹ ٹوئٹر پر اپنا پیغام دیا۔ ٹوئٹر پر جاری اپنی ایک پیغام میں پاکستان کے وزیرِاعظم اور سابق کپتان عمران خان نے کوہلی اور ہندوستانی کرکٹ ٹیم کو آسٹریلیا میں سیریز جیتنے اور یہ کارنامہ انجام دینے والی پہلی ایشیائی ٹیم بننے پر مبارکباد پیش کی۔ خیال رہے کہ اس سے کامیابی کوکوہلی اور کوچ روی شاستری نے آسٹریلیا میں سیریز جیتنے کو ورلڈ کپ سے بھی بڑا اعزاز قرار دیا ۔
