نئی دہلی ۔ 9 ڈسمبر (سیاست ڈاٹ کام ) ویسٹ انڈیز کے اوپنر لینڈل سمنس کی ناٹ آوٹ 67 رنوں کی اننگزسے ویسٹ انڈیز نے ہندوستان کو دوسرے ٹی 20 بین الاقوامی میچ میں 8 وکٹ سے شکست دے دی ہے۔ لینڈل سمنس نے 45 گیندوں کی اپنی اننگز میں 4 چوکے اور 4 چھکوں کی مدد سے 67 رنز بنائے اورویسٹ انڈیزکی جیت کے لئے ایک سرے پروہ آخرتک کھڑے رہے۔ لینڈل سمنس کے علاوہ ان کے ساتھی اوپنر ایون لوئس نے بھی 35 گیندوں پر40 رنوں کی اننگز کھیلی۔ اس کے بعد 18 گیندوں کی اپنی اننگز میں نکولس پورن نے شاندارناٹ آوٹ 38 رن بنائے۔ پورن نے اس اننگز کے دوران 4 چوکے اوردو چھکے بھی لگائے۔ ہندوستانی ٹیم کے 171 رنوں کے ہدف کا تعاقب کرنے اتری کیریبیائی ٹیم نے 9 گیند باقی رہتے ہوئے یہ ہدف حاصل کرلیا اوربغیرکسی مشکل کے یہ میچ اپنے نام کرلیا۔ حالانکہ اس دوران ہندوستانی ٹیم کی فیلڈنگ بھی بہت خراب رہی۔ رشبھ پنت نے بھی دوکیچ چھوڑے، جس کے بعد میدان میں ان کے خلاف نعرے بازی بھی ہوئی۔اس سے قبل ٹیم نے 20 اوورمیں 7 وکٹ کے نقصان پر170 رن بنائے تھے۔ ہندوستان کی طرف سے شیوم دوبے نے بہترین اننگز کھیلی تھی۔ انہوں نے صرف 30 گیندوں میں 54 رنز بنائے تھے اورویسٹ انڈیزکے کپتان کیرون پولارڈ کے ایک ہی اوورمیں 26 رن بنا ڈالے تھے۔ اس کے علاوہ رشبھ پنت نے 33 اورکپتان ویراٹ کوہلی نے 19 رنوں کی اننگز کھیلی تھی۔
