نئی دہلی ۔25 اکٹوبر (سیاست ڈاٹ کام ) تین اہم تبدیلیوں کے ساتھ ہندوستانی ٹینس ٹیم کے اگلے ماہ دورہ پاکستان کے لیے ویزا کارروائی شروع ہوگئی ہے۔ پاکستان اور ہندوستان میں کشیدگی کے باوجود اگلے ماہ قومی ٹینس ٹیم پاکستان جارہی ہے۔ ارباب مجاز نے ٹیم میں تین اہم تبدیلیوں کے ساتھ ویزا کارروائی کا آغاز کردیا ہے۔ روہن بوپانا کے ساتھ پرعالمی درجہ بندی میں 89 ویں مقام پر فائز جانیش گوناسورنا اور معروف ٹینس اسٹار مہیش بھوپتی کا نام بھی فہرست سے خارج کردیا گیا ہے۔ ہندوستانی ٹینس لان اسوسی ایشن نے مہیش بھوپتی کی جگہ لینڈر پیس کو ٹیم کا نان پلینگ کپتان مقر رکیا ہے۔ انٹرنیشنل ٹینس فیڈریشن کی جانب سے ہندوستان کی درخواست پر پاکستان کے ساتھ 14 او ر 15 ستمبر کو مجوزہ ڈیوس کپ ٹائی کو تبدیل کردیا گیا تھا۔ اب نئے پروگرام کے مطابق یہ مقابلے 29 اور 30 نومبر کو اسلام آباد میں ہورہے ہیں۔ ٹینس حکام کی جانب سے ایک بارپھر اس ٹائی کو ملتوی کرنے کا مطالبہ آئی ٹی ایف نے مسترد کرتے ہوئے انہیں ویزوں کے لیے درخواستیں جمع کروانے کی ہدایت دی ۔ ہندوستانی ٹیم کے 11 ارکان کے ویزوں کے لئے پاکستان ٹینس فیڈریشن سے رابطہ کیا گیا ہے۔ جن میں سندر نائرن مینجر،لینڈر پیش نان پلینگ کپتان،سید ذیشان علی کوچ،آنند کمار فزیو کے ساتھ ٹیم ارکان میں سکھت سائی، منہیش سریش کمار،سدرتھ راوٹ، ارجن جیانت،سری رام بالاجی، مکنڈاور سکھت سائی کی سری لنکائی اہلیہ شامل ہیں۔
