برسبین ۔26 نومبر ( سیاست ڈاٹ کام ) ہندوستان اور پاکستان کے درمیان تعلقات چاہے کتنے ہی کشیدہ کیوں نہ ہوں لیکن اکثر دونوں ملکوں کے عوام کے درمیان محبت اور جذبہ خیرسگالی کی دلچسپ مثالیں دیکھنے کو ملتی ہیں اور اس طرح کا ایک واقعہ برسبین میں پاکستانی ٹیم کے ساتھ پیش آیا۔ پاکستان کی ٹیم آسٹریلیا کے خلاف ٹسٹ میچ کے لیے برسبین میں موجود تھی جہاں سیریز کے پہلے ٹسٹ میچ میں مہمان ٹیم کو اننگز اور 5 رنز سے شکست کا منہ دیکھنا پڑا۔ اے بی سی ریڈیو کی مبصر ایلیسن مچل نے پاکستانی کرکٹرز اور ہندوستانی ٹیکسی ڈرائیور کے درمیان ہونے والی دلچسپ گفتگو کا احوال سنایا جسے دونوں ملکوں کے عوام نے خوب سراہا ہے۔ ہوا کچھ یوں کہ پاکستان اور آسٹریلیا کے درمیان برسبین میں میچ کے دوران ایک دن شام میں 5 پاکستانی کھلاڑیوں نے باہرکھانا کھانے کا پروگرام بنایا۔ ان پانچوں کھلاڑیوں نے باہر جانے کے لیے ایک ٹیکسی بک کی جس کا ڈرائیور ہندوستانی شہری تھا اور اس نے فوری طور پر ان پاکستانی اسٹارزکو پہچان لیا۔ ان پانچ پاکستانی کرکٹرز میں نسیم شاہ، یاسر شاہ، محمد موسیٰ، عمران خان سینئر اور شاہین شاہ آفریدی شامل تھے۔ جب یہ کرکٹرز کھانے کے لیے ایک ہندوستانی ریسٹورنٹ پہنچے تو ٹیکسی ڈرائیور نے ان سے کرایہ لینے سے انکارکردیا اور کافی اصرار کے باوجود بھی وہ رقم لینے پر رضامند نہ ہوا۔ ہندوستانی ٹیکسی ڈرائیور کا یہ جذبہ خیرسگالی پاکستانی کھلاڑیوں کو بھی پسند آیا اور انہوں نے اس ڈرائیور کو اپنے ساتھ کھانے پر مدعوکر لیا اور ہندوستانی ڈرائیور نے اس دعوت کو قبول کر لیا۔ یہ کہانی ایلیسن مچل کو اسی ٹیکسی ڈرائیور نے اس وقت سنائی جب ٹی وی مبصر نے گراؤنڈ میں آنے کے لیے ان کی خدمات حاصل کی تھیں۔ سوشل میڈیا پر اس کہانی کو بہت سراہا جا رہا ہے ۔
